世界盃後小休一陣，聯賽重開，嚟緊又可以不停睇波，正！
德甲開「咧」，拜仁係我比較鍾意嘅球隊。講起拜仁，就勾起5月時我入行後第一次去德國，採訪佢哋主場對史特加嗰場聯賽。喺安聯球場買嘢食唔可以就咁畀cash，要先買張以10歐元（約100港元）為一個儲值單位嘅儲值卡扣數。當地人九成都係買大肉腸熱狗加杯啤酒，我試過味道就真係一般！
平日睇直播見馬加夫一臉嚴肅，諗住好惡死。賽後記者會所見，原來佢真人成日笑笑口好有禮貌。最nice嗰個係左閘拿姆，佢沿住球員通道行出來時，個個都訪問佢，但係佢都好有耐性咁答。
希廸布蘭扮吳孟達
相反，有啲就好唔friendly，例如馬卡爾，有人想搵佢影張相，佢即目露凶光；仲有史特加門將希廸布蘭都係「寸」星，佢一見部cam就擰歪面，再玩吳孟達個招「你睇我唔到」，可能輸波無心機啦！
做完記者會後已天黑，由外面睇番安聯球場，成個外牆亮起霓虹光，真係靚到絕頂！YO！
WENDY
由歐國盃EuroBabes，變身球彩台受歡迎主持。