為咗令架車好飛啲，有人選擇換上碳纖頭、尾冚，有人仲癲，索性將車廂所有多餘部件好似後座、喇叭統統拆走，實行幫架車進行地獄式減磅，與其咁花時間又花工夫，有無諗過其實畀錢，就可以買到一架好似呢架由Aerospace研發嘅超輕跑車？呢架叫JavanR1嘅跑車，最獨特之處在於它採用蜂巢形單體式構造，全個車身所用的配件、零件、接駁位都比普通車少，加上車殼用上又輕又夠堅硬嘅鋁合金製造，所以全車只重670kg(1,477磅)，咁輕盈，快跑當然無問題。
跑車裝置出得街落得場
除外形設計和車身物料較特別外，設計師由賽車中取得靈感，特別為JavanR1加入咗唔少賽車配備，好似懸掛同引擎，輕磅車身加上一副直4DOHCi-VTEC引擎，輸出馬力有220匹，雖然唔算好勁，但配合輕盈車殼，0-100km/h只是9.8秒，唔怪得設計師話佢係部出得街、又落得Track嘅跑車，車價亦唔算好驚人，都係5,250英鎊（約$69,000港元）之嘛。
記者：黃婉冰
