飛機陳寫稿，一早預咗出書，出完一本又一本，唔到你唔服，佢又出新書嘞，書名《雲濤偶拾》，由「天地圖書」出版，每本賣五十五元。飛機陳之版權費悉數捐贈「恩光之友會」及「國泰愛心兒童輪椅庫」呢兩個慈善機構。
「國泰愛心兒童輪椅庫」係國泰與中大醫學院合作嘅組織，在威爾斯醫院為香港患有肌肉萎縮症兒童免費訂造特製輪椅。「恩光之友會」係國泰僱員發起嘅慈善組織，自建校舍，為本地智障兒童及肢體殘障兒童提供教育。
飛機陳坐飛機多過左丁山坐的士，每到一地，順手寫番一兩篇，故此稿件源源不絕。佢呢本新書，輯錄咗緬甸、韓國、老撾三國遊蹤，加上一啲旅遊逸事。左丁山對呢三個國家好陌生，只去過漢城（現稱首爾）一次，所以睇呢本書當係學習，譬如飛機陳介紹喺首爾晚上聽爵士樂，酒吧有好幾間，水準甚高，最好一間喺梨泰院（如香港灣仔區），一間㗎啡店RaggaeCafe就以播放節拍厚重嘅非洲風格音樂著名，㗎啡店對面有一間AllThatJazz酒吧，面積小，演奏水準一流，人客彬彬有禮，只可惜價錢昂貴，內裏煙霧瀰漫。
飛機陳自己係夾band高手，佢話「演奏一流」嘅地方，一定係好嘢。嚟緊嘅星期五，飛機陳就大演演奏身手嘞。一年一度，在八月十八日星期五晚上八點四十五分開騷，每位收費二百大元，只限國泰友好參加。去年在美麗華酒店Eyes吧舉行，全場逼爆，今年為免友好向隅，移師銅鑼灣富豪酒店舉行。飛機陳掛頭牌嘅樂隊YoungOnce以國泰航空高層為主，即將往三藩市嘅黃家倫打鼓冇得彈，唱歌嘅有藍寶生、程鼎一、莊偉茵等等等，左丁山舊年聽佢哋唱六七十年代勁歌，為之眉飛色舞，黃家倫話今年加入一啲廣東、國語金曲，包保一眾老友聽出耳油喎，梗係啦，飛機陳彈主音結他，節奏澎湃，黃家倫打鼓勁度十足，機艙服務董事（即空姐教母）莊偉茵唱歌笑容可掬，大家都唔識做？