今天我們來玩cosplay。
劉德華扮醫生，林夕做藥劑師，我們都是病人。
香港人的快樂指數偏低，全球排名只在63，原因是生活壓力大、感情不如意、人情紙咁薄？一切都有待解決。
於是，醫生找來藥劑師執藥，想為不快樂的病人減壓。
拿過藥方，上面寫着：「就算是大俠，也會多愁善感，請張開眼睛，不要再累鬥累了，我們且來觀照世界的聲音，做個模範生。」
啊！原來是叫我們聽完歌，還要聽聽自己的心。
醫生和藥劑師不是神，也曾低落，也是病人。
受過焦慮症折磨的藥劑師說：「其實那只是藥引，有病，就梗係要食藥啦。」 撰文：蔡如玉
林夕常將「香港人嘅快樂指數太低。」掛口邊，他的歌詞何嘗不是？所以改變詞路，不再過於悲情，多寫帶出希望的詞，是他近年的目標。
《如果有一天》到《張開眼睛》，劉德華致力寫道理歌，今次還瞓身做「非」情歌唱片，找來林夕一起填詞，幫忙開解不開心的人。皆因天王與詞神，也曾過度情緒低潮期。
劉德華：華 林夕：夕
華：有病就要醫，呢個係正確觀念。
夕：我不嬲都好信醫生，以前焦慮症冇咁潮，好多人同我一樣，唔知自己患咗，唔開心就搵朋友傾偈，朋友叫你諗開啲，但其實你係病咗，病就食藥啦，冇得諗開啲。焦慮同抑鬱好多時因為腦分泌出事，唔關精神事，係身體機能出問題，正確方法係食藥。
我使咗十幾萬睇醫生，點知個不負責任嘅醫生話我工作過勞，我叫劉華寫「工作過勞」四個字畀我裱起佢，都唔使十幾萬啦。
習慣與痛苦同在
華：我收你十萬啦，哈哈！
夕：後來我睇精神科醫生，佢話係經常焦慮症，我開始戒安眠藥，醫咗兩年，反射作用係成日周身痛，𠵱家仲打緊仗，時好時壞。醫生叫我睇臨床心理治療，我話唔使，我好了解自己，知道做乜會有乜心理反應，我慣於思考，口才又唔差，叫我睇心理治療師即係叫我去同佢辯論，都係自己靠意志力啦，我想像自己身體係空嘅，唔係我嘅，我習慣與痛苦同在，就可以超越。
華：原來用一條頭髮可以驗到腦分泌，使幾千蚊攞去澳洲或者法國驗。我check過，醫生話我接受壓力嘅程度異於常人，我識得將壓力減低變推動力。點變？我呢世人最慘係試過俾最好嘅朋友背棄，要分我身家，仲要lockup我某啲資產，嗰陣覺得呢個世界，仲有乜人可以信呀？真係好絕望好無助，我覺得除咗父母，兄弟姊妹都會呃我，有極度不安全感。後來我就諗，心地唔好嘅人係咪可以永遠好落去。由低潮上番嚟，當時我同自己講，我清楚自己冇做錯事就夠，人哋未必一定要對我好，最緊要自己活得開心，我又反問自己，如果真係冇晒所有，我會點呢？我驚唔驚？答案係唔驚，有手有腳，有氣有力就唔駛驚。錢唔代表一切，一個人最重要係可以面對自己。
夕：唔使煩嘅嘢就唔好諗佢，香港人嘅快樂指數太低。
華：大家都對前途感到迷茫，單講銷售稅，歷史話過我哋知銷售稅係咪啱㗎？
夕：真係莫名其妙，旅遊業已經咁，以前戴卓爾夫人叫彭定康搞，佢都耍太極，搞搞吓都縮番轉頭啦，戴卓爾夫人自己都因為人頭稅而落台，日本推銷售稅時，自民黨都唔掂，究竟乜先係正確，要了解清楚先。
華：坦白講，我覺得唔會通過，所以就唔好諗佢，如果有80%嘅人煩緊呢樣嘢，就唔好再煩。啲人成日話我結咗婚有個女，有啲仲話我同性戀，點講都冇人信我，到我80歲時如果都冇仔女，係咪要寫我嘅人公開道歉先？能力範圍內控制唔到嘅嘢，就唔好煩。
睇《少林足球》忘憂
夕：我好少煩，好少情緒低落，太忙呀。最唔開心係有次一個唱片監製鬧我交詞甩底，搞到張碟遲咗一個月先出，當時我好委屈，佢啲詞畀第二個寫咗六個禮拜唔收貨先叫我寫，仲要我三日起貨，佢畀歌我時張碟已經遲咗，我好唔憤氣，於是好冷靜咁打番去同佢講，當時我冇發脾氣。後來加埋喺公司受委屈先發咗，為埋啲小事鬧人，連助手敲門只敲一聲我都鬧。
華：我都會搵啲無關痛癢嘅嘢嚟發脾氣，對身邊人、朋友同家人，愈熟嘅人脾氣愈大。朋友責任係乜呢？我心情唔好肯畀我鬧吓囉，朋友唔係要嚟成日同你分對錯，嗰啲好極有限。
夕：我低落嘅時候會睇吓佛經，諗吓點解會咁低落，積落嘅修為教我接受同面對。
華：每個人逃離低落都唔同，以前細個我都會怨，出道時見黃日華、苗僑偉有戲拍孭飛做男主角，我就覺得我都做到啦。見人哋訪問周潤發，就諗點解訪問佢咁耐，點解成個記者會完咗啲人都唔嚟訪問吓我？諗番都覺得好笑，因為嗰陣我冇機會，修為未夠，個人急，睇唔通將來，所以𠵱家要講畀啲後生仔知，唔好畀自己太大壓力。我都惡脾氣過，都扮過大牌，嗰陣拍《神鵰俠侶》拍到好累又眼瞓，程小東叫我繼續打，我就講一聲：「我眼瞓呀。」掉低把劍就走咗，成個廠就咁停晒。𠵱家個人經歷多咗，煩躁就寫書法，嗰單一億二千萬，我第一次收法庭傳票時，心情好亂就寫咗張好肉酸嘅《心經》，到𠵱家仲掛喺我屋企，要嚟警惕自己，提自己唔好貪錢。
夕：你寫書法，咁我會睇吓搞笑片。
華：嘩，周星馳真係功德無量，我有時低落都睇《少林足球》。
夕：喂，握吓手先。我嗰陣病到成個人歪晒，痛到喊，叫朋友嚟陪我睇《少林足球》，笑到忘記，個心唔順就睇周星馳，我足足睇咗50幾次《少林足球》，最正係大師兄歸位，我一睇到大師兄返嚟，就諗我自己返唔返到嚟呢？
華：原來一直唔見咗自己，去到委屈盡頭，就會返嚟。
攝影：林德雄 場地提供：奧海城
