上周恒指與紅指同創6年來新高，紅指勁過恒指，比去年底大升32%，炒落後紅籌，贏面更大，今周要博中旅國際（308）。
同級紅籌越秀投資（123）上周收1.41元，比去年底0.80元勁升76.3%，跑贏大市。粵海投資（270）冇咁叻，亦升2.4%。最落後係中旅，收1.77元，比去年底1.86元，仍跌4.8%。
中旅4月中曾升至2.35元，證明非無大升條件，現價回跌25%，點計都值2.45元（假設與紅指同步上升）以上，值得追落後。
併購大行動開始
任何一隻股票都有強弱點，只要強項多過弱點，加上股價未反映其實值，就要睇多幾眼，睇見就心郁，更加要有行動。
先講弱點，中旅只有兩個：
弱點一：中旅05年度（12月年結）盈利6.12億元，減4.2%；粵投與越投均有增長。
弱點二：中旅迄今無基金持有超過5%；粵投相同，而越投則有GandharaMasterFund持有5.15%。
再數強項，一二三四五六數唔盡：
強項一：大股東中國旅行社總社，持有52.56%；有國家作後盾，無後顧之憂。
強項二；執內地旅遊業牛耳，今年且展開併購大行動，計劃收購內地17間旅行社，迎接旅業起飛期。中國為世界第4大旅遊強國，中旅前景靚爆鏡。
強項三：旗下珠海海泉灣渡假城今年開業，首7個月到訪達170萬人次，佔珠海遊客半數，已成為必遊景點；新增加勒比海水上樂園8月4日開幕，下半年遊客料必大增，估計可超過300萬人次，為中旅帶來額外收益。
強項四：海泉灣第二期投資5至6億元，興建高爾夫球場、酒店與溫泉，加上有80萬米河灘撥入其範圍內，勢必成為中國頂尖旅遊勝地。
強項五：台灣計劃開放內地人士自由行，一旦落實，單係安排旅運與訂機票酒店服務，都要幫襯中旅。
強項六：經亞洲金融風暴後，中旅積極多元化，經多年擴張，目前已擁有電廠、鋼材、地產與物流業務，盈利基礎更穩固。
強項七：旗下旅遊電子交易平台「芒果網」（www.mangocity.com）去年底試運，相當成功，今年投入服務，迎合電子普及化大潮流，增加收入來源。
強項八；05年底每股NAV1.96元，P/B僅0.9倍。
其實弱點都可變強項。05年盈利倒退，只因海泉灣渡假城開業前開支增加，今年盈利料可恢復增長。大行JP摩根分析員今年首季訪問中旅高層後，即調高其投資評級至跑贏大市，預測06年盈利達9.08億元，增48%，07年再增37%至12.46億元，每股盈利0.16元與0.22元，現價PE僅11倍與8倍，遠低於紅指06年預測PE平均14倍。
基金未入股，等於仲有入股潛力未發揮。大行既已提高其評級，只要有基金行出第一步入股，羊群效應立現，弱點反變強項，其上升爆發力料必驚人。
仲有幾個概念
強項仲可以更強，海泉渡假城今年黃金周入場達74.75萬人次，收入1.78億元，平均每人消費238元。假如全年達300萬人次，收入逾7億元，為05年集團營業額12%。此類渡假城主題公園，人數愈多，邊際利潤率愈高，相信必勝過集團平均所得10.8%，賺錢能力更強。
仲有幾個概念隨時可轉為事實。一係母公司可能注入招商旅遊業務，一係分拆旗下業務上市，例如電廠、物流，甚至「芒果網」，均可為中旅加添利好變數。
返回炒落後，有上述大好條件，只要追上紅指升幅，重上2.45元，以07年預測PE計，只去到11.1倍，P/B1.25倍，亦僅及JP摩根所訂目標價2.85元嘅8.5折，加埋上周五成交突增36%，配合技術指標轉強，追得過。
高彰坡