無牌食物工場屢禁不絕，近年更有聘用黑工走入民居的趨勢。本報早前接獲讀者舉報，其居住大廈有單位被用作飯盒製造工場，疑無牌經營外，更用黑工擔任送貨，弄得大廈烏煙瘴氣。經本報轉介此投訴予不同政府部門後，部門翌日即採取行動，破獲該工場，並拘捕八名非法勞工。
居於深水埗基隆街明基樓一名本報讀者投訴說：「呢幢唐樓得六層，間食物工場就喺最高嗰層，舊年尾開始做生意。佢哋淨係做外賣飯盒，主要嘅客人都係附近布行，我問過啲送外賣嘅人，飯盒連例湯，唔使20元，所以好受歡迎，每日十點幾鐘開始，做到晚飯時間，啲人不停咁走出走入送貨！」
無牌經營食物工場外，有關單位更疑招聘非法勞工。他說：「啲送外賣嘅人，嗰嗰都講普通話，佢哋認係攞雙程證落嚟打工，所以成日轉人，但平均都有八、九個呢啲黑工長駐，有時仲有啲細到好似得14、15歲嘅童工。」
單位傳出煮食聲響
記者現場所見，明基樓五、六樓梯間明顯較為污穢及放滿雜物，天台則放着三大罐未啓用的石油氣；有關單位則不斷傳出煮食聲響，每隔三、五分鐘，便有電話響起，屋內即會回應「四季豆炒肉絲、豉椒排骨飯走例湯」之類核實餐單的說話。
另一位住戶說：「每日喺度炒菜煮飯，啲油煙就係咁攻出嚟，大家都唔敢晾啲衫出窗，日頭又唔可以開窗，否則油煙飄入屋。最初佢哋打開大門，啲熱氣係咁標出嚟，搞到走廊好鬼焗，話咗佢哋幾次，先肯閂番門。」
積放於梯間的雜物與石油氣，最令住客惶惶不可終日。住戶黎女士說：「條樓梯擺咁多雜物，滋生蟲蟻惹老鼠；個工場長期放兩、三罐石油氣出嚟樓梯，加埋佢屋裏面，唔知仲有幾多，同埋大量發泡膠飯盒，火燭起上嚟，就真係累死街坊！」檔案編號：0801061
