53歲的洪叔因從事的製衣老本行式微被迫失業，需依靠綜援金過活。他與已離婚妻子同住兩年後，終獲編配新單位，惟卻因無力負擔搬遷所需費用而坐困愁城。
洪叔於年輕時當製衣工人，惟因本港製衣業工序北移，致日漸式微，其任職的製衣廠終在98年結業，他被迫從事其他工作。「嗰時40幾歲，又冇其他專長，只能夠做啲短期雜工，初期都搵到嘢做，但係幾年前開始，連短期工都好難搵，成日失業，迫住要向政府申請綜援。」
與妻兩年前離婚
除工作不如意，洪叔的婚姻也出現問題，「因為性格不合，加上經濟環境又唔好，大家真係相處唔嚟，我同前妻終於喺兩年前簽紙離婚。我哋同10歲嘅囡囡原本住喺公屋，簽咗離婚紙之後，我即刻向房署申請另外一個單位，但我又冇收入，喺等配屋呢兩年，迫住要同前妻一齊住。」
經過兩年時間，洪叔早前終獲房署編配同邨一個單人單位。「我自己一個人每個月得千幾蚊綜援金，𠵱家交咗屋租同按金後，已經冇乜錢，水、電按金、家庭基本電器同家具，全部我都冇，乜都要重新添置，我真係冇咁嘅能力。」洪叔苦惱地說。
洪叔稱，目前他仍在修讀保安員課程，修讀完畢便可嘗試找尋工作，只是現時搬遷新屋所需費用，卻無力應付。蘋果基金知悉洪叔經濟陷入困境，已撥款8,000元助其紓困。捐款編號：C2120