本身是愛狗之人的古天樂和張家輝，經常有機會跟狗隻做對手戲，雖然在技術上有一定困難，但二人均認為與BB相比，跟狗隻做對手戲實在輕鬆得多。
古仔說：「同動物合作易過同BB好多，因為啲狗通常受過訓練，現場又有專人跟場，叫佢跑就跑，跳火圈就跳，比較易控制啲。不過當年我拍《寵物情緣》嗰陣，都試過天氣太熱，隻狗唔肯開工，有時又因為太長時間工作，隻狗太攰，都會集中唔到精神，甚至狗公遇見狗乸嘅話，又會有啲突發情況發生㖭！」
要摸熟脾氣
在電影《完美情人》中扮狗的張家輝說：「狗都有情緒，所以未拍之前最好摸熟隻狗嘅脾氣；我試過同隻狗一齊吊威吔，見到佢都幾辛苦㗎，未試過吖嘛，如果係自己隻狗，我一定唔肯畀佢咁做，有時拍一個反應又要成半日，做足12粒鐘，人都未必肯制啦。」