Stephy 貪戀型男
「其實我一向都冇睇漫畫書嘅習慣，但係呢本《死亡筆記》就真係好吸引，初初睇我都唔知講緊乜，但愈睇愈好睇，所以就一路追住睇，而且個男主角又畫到好鬼型，個故事情節又好刺激，不過當中涉及鬼神嘅嘢，都有啲恐怖㗎，但係我都好期待睇佢嘅真人電影版，因為見到兩個男主角嘅眼神好似漫畫原著，令吸引力大增。」
推薦漫畫：《死亡筆記》
作者：小畑健
關心妍 偷扮小雲
「《IQ博士》呢本書可以話係漫畫嘅經典，我好細個已經睇，最鍾意裏面嘅小雲同山吹老師，小雲個樣可愛搞笑，山吹老師就靚，最重要係佢個角色善良，我仲有儲佢哋啲公仔，記得細個時我仲有扮過小雲㖭，真係好搞笑。其實自己細個都有睇漫畫書嘅習慣，好多種類都有睇，好似《龍珠》、《蠟筆小新》同《去吧！稻中兵團》都有睇㗎。」
推薦漫畫：《IQ博士》
作者：鳥山明
周麗淇 情傾許樂
「其實我好少睇漫畫㗎！以前要拍一套電影，因為係改編自漫畫，所以就睇下《百分百感覺》，呢本書係愛情書，所以追看性好高，睇睇吓我就不斷咁追落去。睇完之後都好鍾意許樂同Cherry，許樂好多表情都好好笑，雖然佢好似冇嚟正經，但佢係一個好專一嘅男仔，所以好吸引我，難怪呢套本地漫畫咁受歡迎。」
推薦漫畫：《百分百感覺》
作者：劉雲傑
鄭融 鹹濕乒乓
「我最鍾意睇《去吧！稻中兵團》，呢套漫畫正到爆炸，每個角色都有佢獨特性格，但係每個人都好有趣，加上個故仔又好豐富。最有印象係主角前野，佢中間分界，個樣又得戚。劇情有啲鹹濕，其中一個角色俾人塞乒乓波，班主角又過去裝個阿婆沖涼，點知阿婆個胸跌咗入坑渠！當啲水沖走時，阿婆個胸都畀水扯走埋，當時個樣好好笑。」
推薦漫畫：《去吧！稻中兵團》
作者：古谷實
