影音試團：06AVShow最後召集　百人爭睇高清決戰

影音試團：06AVShow最後召集　百人爭睇高清決戰

今年一連三日嘅2006香港高級視聽展，到今日已近尾聲，今屆備受發燒友關注嘅兩大高清影碟陣營Blu-ray及HDDVD，均有不少參展商在會場內做Demo，更同場拍埋畀大家分高下；東芝、新力、三星、馬蘭士等多間大廠已急不及待畀旗下的Blu-ray或HD播放機種曝光，喺其中一間展示房入面，更引嚟過百戲迷坐定定，等睇高清影碟正式埋牙火併！

文：李廸偉　攝影：伍慶泉
ImageGirl：Ruby

■兩大陣營最厲害交戰區，卒之引嚟過百觀眾入場等睇戲。

每年香港高級視聽展，都會隨入場券附送一隻發燒級嘅《原音》SACD，今年未正式開Show，網上已有大批發燒友爭論今年嘅《06原音》SACD，仲話係歷屆最吸引一款，唔想過後用炒價買番隻碟，今日一於趕搭尾班車，到會展行番個圈喇！

過後必炒
■入場附送非賣品發燒碟《06原音》。

展覽最後今日

時間：上午11時至下午5時
入場費：
$50（送《06原音》SACD一隻﹚
$100（送《06原音》SACD+LPCD45各一隻﹚

兩種門票各有吸引

大會第一日開放時間係早上11點，但我們朝早10:30前到達，竟發現已人頭湧湧，直到晚上7:30將近關門前仍有發燒友購票入場，單睇第一日感覺上比過去幾屆也旺丁旺財得多。
潮流興隱藏版，今屆AVShow都唔例外，沒有事前張揚，入場費原來分$50及$100兩種；$50門票送《06原音》SACD，而$100門票多送一張LPCD45版本畀你。據知LPCD45只印了數百張，對於每年有數以萬計的發燒友入場，這張碟日後又必成當炒二手目標。

■5B展館佔地最大，不過太多大廠擺檔，所以一樣逼爆人。

排隊爭攞大師簽名

每年視聽展也舉辦現代音樂會娛賓，今年多達八場演出，肯定係歷屆之最，而且陣容強勁，除大家熟識嘅夏韶聲、區瑞強之外，就連國內的二胡大師閔惠芬也親臨演出，還為現場朋友簽名留念㖭。而今日最後一日則有陳潔麗、胡琳等喺現場做Show，唔好錯過啊！

■二胡大師閔惠芬親臨現場，為曲迷簽名留念。

今年的參展商數目及會場面積也更勝往年，會場展區共分四至六樓三層，五樓為售票處及佔地四萬平方呎嘅展區，5B展館地方雖然最大，但仍是人頭湧湧，賣CD、DVD及黑膠唱片的軟件區更加係擠逼得水洩不通。就現場所見，有唔少發燒碟售價也平過市面，仲要係買得多平得多嗰隻。而另一人潮重災區則在六樓，因為多間音響代理盡Show佢哋最駕勢堂嘅名貴器材，而Blu-ray大戰HD亦主要在這層進行。

■唔只硬件威，連賣CD同黑膠碟嘅攤位都擠得水洩不通。

■估唔到連小朋友都識欣賞粵劇戲寶《帝女花》。

■會場率先發售XRCD版《李克勤演奏廳》。

兩大高清輪流播

六樓605號房係Blu-ray與HDDVD兩大陣營最厲害交戰區，基本上無時無刻都有過百發燒友逗留觀戰。代理SoundConcepts更動用多部Blu-ray及HD播放機作即場示範，平到幾千蚊一部東芝HD-DVD播放機或貴價嘅LexiconHD-DVD播放機也放埋一齊輪流示範，等大家即場分辨兩大影碟制式嘅優劣。而Blu-ray播放機則主要由SAMSUNG把關，還定時定候有專人開咪喺Show講解（主持人影音專家AlanLee相信無人不識了）。而同時還有一部昂貴的PanasonicD-5專業級錄影機及Marantz1080pDLP投影機播放高清1080i母帶。咁多平時難得一見嘅靚機列陣，唔想排大隊，今日最好早點到房外等候。

■代理SoundConcepts動用多部Blu-ray及HD播放機，作即場比較示範。

■昂貴的PanasonicD-5專業級錄影機，難得一見。

85萬機靚播陳奕迅

隔鄰嘅606號房亦係Blu-ray同HD-DVD嘅交戰區，亞洲影音出動全港只得一台、價值85萬港幣嘅SONYSRW-5500來播放HD高清母帶，市面所發售以HD高清製作的幾張本地現場演唱會DVD，也可在房中睇到「真正」嘅1080i高清效果，並非市面賣緊嘅「假」高清影碟，所以在門口經過也不時聽到內裏播着《陳奕迅GetaLife演唱會》，想感受真正高清滋味，就要親臨現場喇。而Blu-ray播放機則以Panasonic作主打，SONY反而較低調，至於HDDVD播放機就由東芝自家撐場迎戰。

■SONY呢部高清母帶機，值85萬，現場狂Demo陳奕迅嘅《GetaLife》演唱會。

後來者Blu-ray晒實力

■暗位最試到Detail，現場見到夜景畫面依然睇到天空雲層，噪訊亦唔算嚴重。

■鮮艷顏色特別突出，唔知係Blu-ray定係靚芒BRAVIA嘅緣故。

■一堆樹木同草地層次分明，高清解像度果然厲害。

超豪三百萬擴音機

音響方面，在6樓最受注目嘅包括一對定價78萬AvalonIsis喇叭，仲有被唔少現場人士形容為富豪級iPod、價值港幣15萬、毋須壓縮即可儲存1,500隻歌曲碟嘅大型Server。而全場最貴音響組合定價接近四百萬一套，位於四樓408號房，但音效表現最好嘅房間則幾乎喺晒六樓，而全場最貴的一套價值三百萬的Dynaudio擴音機組合，就正正在五樓會場入口處，換句話講即係睇少一層都唔得。

■發燒友主要嚟睇機，所以ShowGirl唔多，Denon呢兩位算係全場最受歡迎。

天價擴音機
■價值三百萬的Dynaudio擴音機組合，屬全場最貴擴音機。

■大型Server能儲存5,000隻音樂碟，差不多近萬五首歌。

■呢對AvalonIsis喇叭價值港幣78萬。

高級喇叭整畀你睇

Dynaudio除咗Show套幾百萬擴音機外，還模擬了一個喇叭音箱的製造工場，畀大家睇吓廠方如何打造一個音箱出嚟，同埋高價喇叭因乜事咁貴，頗具教育意義呢！而五樓展區還有兩大特色，一是Demo黑膠唱盤的代理特別多，而高清投影機嘅牌子亦唔少，證明Blu-ray同HD-DVD被高度關注之餘，傳統的模擬錄音亦愈來愈多人重投懷抱。

■Dynaudio模擬了一個喇叭音箱的製造工場，引嚟唔少人「手摸摸」。

■外表Cyber到暈，好難估到佢原來係黑膠唱盤。

■高清投影機殺到香港，睇高清唔一定再靠Plasma或LCDTV。

■奧地利製嘅Ayon前級，成塊底板都係用24K純金製作，豪到爆。