豬肉佬提刀一劈、臘味師傅快速亂斬，都唔及刀神康哥嘅刁鑽一刀。話說某Day經過佐敦搵料，竟然俾我見到康哥嘅神乎其技，佢話：「你信唔信我可以起晒條魚啲肉，但條魚仲可以繼續游水吖？」康哥手起刀落，轉眼間片起鐵鱲兩邊魚肉，之後將條魚放番入魚缸，「等一、兩分鐘，等條魚灌番水，就會迴光返照亂咁游。」果然兩分鐘後，魚尾開始擺動，得番棚骨嘅鐵鱲終於游水喇，但竟然係向後游，好似表演花式咁，「通常劏完之後佢都會亂咁向後游，點解我就唔知喇。」條魚足足游咗成4分鐘都未魂歸天國，仲引嚟唔少途人圍觀。
咁玩法，講真都幾殘忍，所以康哥絕少將呢項絕技曝光：「無謂喇，條魚好慘㗎，你叫到我先示範畀你睇咋，無諗過要當Show咁表演畀人睇。」咁點解條魚會唔死嘅？「切得刁鑽囉，我無切斷到條魚嘅神經線，一切斷佢就會無晒反應。鐵鱲襟捱啲，因為內臟比較重，就算𠝹穿咗少少佢都仲識得游水。」條神經線喺邊呢？「大概係魚鰓附近位置，呢樣嘢要靠經驗㗎。」
記者：黃若茵
攝影：陳陶鈞
1鐵鱲刺身每條$168
鐵鱲咬落不覺油膩，魚肉片得薄，不會過韌。
2花竹蝦刺身每両$22
蘸檸汁、清酒及豉汁調製而成的酸汁，更能誘發蝦肉的爽口鮮味，入口肉質爽脆，酸味恰到好處。
3牛肉刺身例牌$128
每碟約有18塊，取牛背脊位置，入口即溶。
圍觀者有Say
牛王（27827129）
地址：佐敦上海街138-142號地舖