早幾日環保人士就發起咗全港熄燈3分鐘嘅行動，呼籲大家要環保，跟手仲可以慳電慳錢一舉兩得。但淨係嗰日熄3分鐘燈有鬼用咩，要慳電慳錢，就梗係要日日Keep住施行「慳電大法」！講到慳電妙方，慳嫂除了在選購電器時專揀一級能源效益標籤外，持家仲有大把「慳電小動作」，一於由大型最食電嘅家電開始啦！記者：葉雪芯
攝影：楊錦文、周旭文
示範：阿細
冷氣機 食電王連風扇齊開
開埋風扇仲慳家
又開冷氣又開風扇，唔係仲嘥電咩？錯晒啦！慳嫂持家20年，佢話開風扇可以幫助冷氣送風更平均，冷氣又唔使開咁大，舒服啲又慳電啲㗎。
習慣校時間掣
現時市面上多數冷氣機都有時間掣裝置或者「睡覺模式」，校好先瞓或預好時間先出門，失魂魚記得跟。
定期洗隔塵網
隔塵網積聚太多塵，便會散唔到熱，冷氣機會耗更多的電去運行，最理想每2星期洗1次。方法便就是讓水由隔塵網底部（即貼近機身的一面）向下射入，這樣才可將灰塵順利沖走。弄錯方向的話，可能會令灰塵更加黏緊在隔塵網上。沖灑後可再用刷輕刷並須晾亁。
高1度慳5% 27℃涼入夢
雖然環保團體叫大家開冷氣至25.5℃，但瞓覺時體溫會低一點，所以冷氣校至26、27℃都夠涼。而每校高1℃可慳5%電費，一般人日頭都未必係開24、25℃，慳嫂就係咁慳10%以上電費。
電燈 燈泡彈開
慳電膽節省75%
最易嘅方法，較傳統燈泡節省75%電力，壽命亦可延長達10倍，大家仲唔快啲改用慳電膽？
光管長命過燈泡10倍
光管光度強而慳電。一支40火嘅光管所發出的光量較3個60火嘅電燈泡更強，同時使用壽命也超過普通燈泡10倍。另外，避免或減少使用最嘥電的多頭多射燈豪華燈飾。
用淺色牆
要慳電，就連家居設計都要顧及埋，天花板和牆盡量用白色或者淺色系，利用反光和光線折射嘅原理，用細啲火數嘅燈膽，都可以好夠光，咁又可以慳到少少喇！
雪櫃 同牆要分離
離牆10cm
所有電器都要散熱，雪櫃要離牆至少10cm，距離天花板就至少要有30cm。
膠邊要貼門
雪櫃用舊咗，櫃門膠邊就很易鬆，走冷氣迫使雪櫃自動不斷加凍。而要雪櫃門能夠完全關起，全靠雪櫃膠邊的磁力吸實門，如果發現膠邊開始鬆鬆哋，可能是磁化出現問題，要解決，可以用強磁鐵（鴨寮街買到）放在膠帶上，每相距5-10cm放一次，每次放大約3-5分鐘，直至全條膠帶都做過，這樣可使它恢復磁力了。
忌放近爐頭
雪櫃千祈唔好擺得太近爐灶，爐嘅熱氣又係會影響雪櫃嘅冷凍效果，要雪櫃不停開Turbo送冷氣，食電到不得了！
「常滿」8成
雪櫃「常滿」固然好意頭，但食物放得「密質質」，會擋住出風口和吸入口，影響冷空氣循環，所以只放8成滿就夠。
洗衣機 開機7分滿
開機7分滿
洗衣機洗埋洗埋咁多污糟嘢，會積咗好多污垢喺內櫳或隔棉網裏面，時間耐咗，洗衣機就會用多啲電去發力轉動內櫳。想慳電，可拆隔棉網出來用清水洗淨；至於內櫳的窿位可用牙刷「疏通疏通」。
裝7分滿
有啲人，一件衫又走去開機洗衫，咁就當然浪費電力！但係有啲人儲咗幾大噸衫先開機，以為咁樣慳到電，又係錯！因洗衣機只會用更多電力去轉動，負荷重咗，部機仲易壞啲㖭。其實每次洗衫只要裝7至8成滿就好了！
忌多用洗衣粉
唔好以為用多啲洗衣粉，啲衫就會洗得亁淨啲，過多洗衣粉反而會阻塞咗去水管同埋隔棉網，洗衣機易壞之餘又用多咗電。約2kg衫可用20g洗衣粉、約3kg用30g、4.5kg以上就用40g。
小家電一樣有得慳！
電飯煲 浸米好慳家
洗好米都用水先浸生米一會兒，之後才開着電飯煲，啲米會快啲熟㗎！
電熨斗 大件厚衫先熨
要用高溫熨嘅衫例如牛仔褲、西裝、恤衫等就熨咗先，然後拔掉插蘇，利用餘溫熨其他輕巧衣服。
微波爐 爐中慳嫂
如果食物份量唔多，就多用微波爐，因為微波爐比一般嘅電爐用電量少好多㗎。
