今個星期居然有3個熱帶風暴同一時間出現西太平洋！唔會係「明日之後」啩？
喺九龍城食完「消夜」，遇着傾盆大雨，係咁閃電，好在手車算定，安全返到屋企！再揼埋媽咪炮製碗涼茶落肚，十萬個幸福！老竇話：「如果搬出去自己住唔好講話涼茶呀，連滾水都冇得你飲呀。細路！」全中，記得珍惜再珍惜！
「足球係我嘅夢想」
呢個星期喺流浪練波，又可以同一班充滿鬥志嘅年輕人一齊踢足球，實在好正！其實我係俾志豪、嘉緯、均宜同偉豪等隊友感染咗，而我要提醒自己，足球係我嘅夢想，無論運動發展有幾多負面消息同報道，我都會堅持夢想，繼續踢落去。
德甲聯賽今日開鑼，又係時候做功課，免得俾舜文同榮基話我認球員唔夠快。我知喇，我會畀心機，以免有辱兩位師兄威名。
希望黎巴嫩同以色列嘅戰亂快啲平息，要打，就兩邊首領單對單搞掂啦！無謂傷及平民百姓，主恩常在！
馮嘉奇
踢出香港的傑志球星，親身歷盡各國足球風情。