新Game曝光:陸高、渣古殘鬥殘

新Game曝光:陸高、渣古殘鬥殘

臨近11月正式發售日,愈嚟愈多PS3新作公布,喺剛過去嘅E3度亮過相嘅《機動戰士高達:鎖定目標》,逼真畫面曾令一眾高達Fans嘩然,亦有唔少機迷採保留態度,認為係廠商作大「嚇鬼」伎倆。近日開發商BANDAINAMCO就公開一批更新嘅遊戲畫面,大家可以睇到,出現嘅一堆MS唔單止造型極其細緻逼真,從陸戰高達手指關節活動、渣古幾條氣喉逐節做出嚟,足證多邊形數量如何豐富!至於貼圖亦毫不含糊,整個MS均「風塵僕僕」,滿布沙塵及舊化處理,像真度極高,即係所用貼圖色素夠多外,解像度亦係好高。呢兩點均令PS3須應付超大量數據運算,暫時「小貓」三兩隻唔覺有問題,希望到正式推出時,唔會一遇到圍抽戰況就Lag到爆啦。
遊戲故事依然係玩過N次嘅「一年戰爭」,暫時未見RX-78、格洛古古等名機,只係陸高、吉姆等「二打六」出場。雖然《機動戰士高達:鎖定目標》未定發售日期,不過預計喺9月中嘅東京電玩展2006上,可望玩到更進化嘅試玩版;係龍定蛇,9月分曉!記者:徐影龍

網址: http://ps3-gundam.net/

■渣古嘴邊同大腿嘅氣喉,居然夠膽逐節做出嚟,擺明晒料!