張韶涵噚晚喺上海舉行「百變新勢力」演唱會，組合五月天同范瑋琪都有份做表演嘉賓。張韶涵着咗套科幻裝，化身成星際女戰士亮相，之後又換上多套靚衫上陣，不過顏色都係以紅白黑為主，而且套套都幾性感。因為喺農曆7月鬼節期間演出，所以張韶涵事前特別去咗城隍廟拜神，祈求演出順利，不過噚晚綵排嗰陣貼喺後台嘅流程表突然離奇着火，同事見到猛叫：「火燒旺來。」