噚日又見到奇特廣告一則，印咗金鐘東昌大廈幅相，但究竟係放租定放售？全幢定分層？摷晒全篇廣告都搵唔到。咁詭異，梗要打去負責嘅第一太平戴維斯問清楚喇！打去問咗兩句，原來係地下同1樓商場同時放租或放售，地下就8000幾呎，一樓就1.2萬呎。諗住再八吓業主係邊個、意向價幾多，點知位sales姐姐竟然問蘭西係咪有興趣買。
其實蘭西一早就表明咗身份，聽到佢咁問都好愕然，於是就解釋都係想了解吓，同啲讀者分享。點知對方即時「閂閘」，話唔可以代表業主講嘢，又叫蘭西最好唔好寫呢個消息出嚟。蘭西真係𢱑晒頭，使得錢登廣告，無非係想多啲人知啫，蘭西報道等於幫佢免費宣傳，佢竟然耍手擰頭，業主真係多得佢唔少。
蘭西當然無咁易死心，翻查資料，原來物業係裕泰興家族成員羅守輝喺舊年10月，向UFJ銀行買嘅，當時連埋9同10樓寫字樓，作價2.9億，估計商場部份值1.6億左右。
講開羅生，另一個羅生羅家寶，啱啱先話放棄買灣仔活道項目，轉個頭就用3000萬，掃咗西環科士街36號C、D舖同埋38號A至D幾個舖，一共7800呎，呎價3846蚊。
電郵地址：[email protected]