2006年度香港小姐競選決賽今晚舉行，16位候選佳麗昨穿上三點式作最後一擊造勢宣傳，但賠率最高及匯應通最高票數的新聞女王8號徐淑敏卻流露疲態，反觀其勁敵13號陳茵媺則愈戰愈勇，加上才藝學歷均相當出眾，大有機會勇奪冠軍寶座。
應屆港姐競選決賽今晚假紅館舉行，據聞六叔邵逸夫也會出席，16位候選香港小姐昨日作賽前最後一波宣傳，齊齊穿上三點式亮相，綜觀16位佳麗的狀態，一路以大熱姿態在易勝博賠率中遙遙領先的8號徐淑敏，竟在賽前走下坡，昨日她容顏憔悴，眼袋腫脹，反觀近日惹上隆胸疑雲的13號陳茵媺則狀態大勇，截至昨日為止其賠率更攀升至第三位，走勢凌厲。
有網友更在留言板上大讚陳茵媺學歷高及才藝了得，大有機會問鼎冠軍寶座，陳茵媺也對自己充滿信心，直言無懼隆胸負面新聞，她說：「我冇睇雜誌，所以唔會影響到我嘅心情。」問到有沒有信心奪冠，她謙虛地說：「個個女仔都準備得好好，我自己有信心，但係冇諗過得獎。」
發誓冇陪食
至於在易勝博成1.5倍大熱的徐淑敏，雖然狀態回落，但她仍自信十足，誓要打破以往最多新聞佳麗必大熱倒灶的慣例，她說：「我相信新聞唔會影響評判，呢啲只係富娛樂性嘅新聞，我希望打破呢個慣例。」她又表示成賠率大熱十分高興，但不會讓男友下注，她說：「我唔會畀佢當我係件物件，同埋佢都唔會去賭。」
提到近日有關擺陣及飯局換獎的傳聞，徐淑敏說：「我問過屋企人同朋友，冇人幫我去擺，如果係咁多謝幫我祝福嗰個人，至於飯局我敢發誓一定冇，呢件事我男朋友都好嬲，佢覺得女朋友俾人誣衊。」無綫匯應通遊戲首五名獲最高票數的佳麗，是8號徐淑敏、13號陳茵媺、1號曾愛媚、5號呂慧儀及14號李穎芝。
此外，一班佳麗連日積極綵排，昨日凌晨約12時16位佳麗離開紅館時，有默契地分成幾組乘的士，但12號謝穎珊返抵藍田寓所時，卻發現忘記帶鎖匙，相當狼狽。
採訪：楊潔雯 攝影：仇志德
