李嘉欣兩個月前獲許晉亨陪伴度過36歲牛一，兼獲情繫18載的舊愛劉鑾雄（大劉）登廣告賀壽，其後她陪許公子遠赴歐洲展開浪漫之旅，豈料嘉亨戀維持短短4個月後卻出現戲劇性發展。前晚以性感打扮出席公開活動的李嘉欣忽然自稱單身，揚言許晉亨連好朋友也稱不上，但她又聲稱身邊一直有細心男伴，似向大劉發出弦外之音。
大美人李嘉欣的愛情故事迂迴曲折，每次都令人驚喜無窮。今年6月，她左右逢源，既獲富豪舊愛劉鑾雄一擲20多萬、以「TheOne」名義在報章刊登全版廣告賀她36歲生日，同晚又與新歡許晉亨共度二人世界，兩人其後再坐車離開豪宅，陪同因急會伊人而忘記拉褲鏈的許公子到機場，當時他們牽手同坐車廂，甜蜜煙韌盡在不言中。
聲稱單身
揚言暫不適合拍拖
曾揚言「我今年生日過得好開心」的嘉欣，隨後遠赴歐洲會合許晉亨睇世盃，玩足大半個月才返港。想不到隨着世盃大戰結束，嘉亨戀即極速降溫。前晚李嘉欣身穿名貴Gucci晚裝，露出半球及美腿，到灣仔會展出席Nokia手機發布會，被問及與許晉亨之間的戀情時，她大改口風，直指與對方再見不是好友，擺明劃清界線，但言語間又透露身邊一直有人待她很好，大劉之名呼之欲出。其訪問節錄如下：
記：記者李：李嘉欣
記：你同許晉亨係咪半公開戀情？
李：我從來冇講過拍緊拖。
記：你哋早排同車喎？
李（面露不悅）：係傳媒誤解，我唔會參與意見同解畫，唔明啲人點解覺得我公開囉，我從來冇話過拍拖，但我唔會參與意見。
記：你𠵱家有冇拍拖？
李：真係唔係。你哋有冇相先？我不嬲都冇講感情事，傳媒點寫我都冇辦法。
記：你同許晉亨算唔算係好好嘅朋友？
李（斬釘截鐵）：唔算。
記：你哋有冇發展機會？
李：我唔知，𠵱家又冇塔羅牌同水晶球。
記：係咪因為許晉亨未離婚？
李：呢啲又係揣測。
記：許晉亨係咪追求你呢？
李：真係唔知。好多朋友對我好細心，成日覺得自己冇朋友，原來有人好留意我同對我好好嘅。
記：你同許晉亨會唔會係煙幕，真命天子另有其人？
李：呢個又係另一個故事，我唔會參與意見，如果我畀意見會好亂，冇一個版本係真，唔知講嗰個真命天子係乜水。
記：你𠵱家係咪單身？
李：我同香港嘅單身女性冇分別，係獨身女士。
記：你幾時至會唔獨身？
李：呢樣嘢唔係適合每一個人。
記：你係咪啱拍拖多啲？
李：呢一刻唔啱我。
大劉起勁
冒雨赴銅鑼灣巡舖
由於李嘉欣忙於陳述嘉亨戀，她一時失手，不慎露出腋下疤痕，記者問嘉欣會否與男友以暱稱互傳sms時，她還冷淡地說：「唔會，我係用全名儲存，所有男、女朋友都係用全名。」又稱不會與男友打情慾短訊。
前晚李嘉欣完成活動後，即返渣甸山香閨，但同時間大劉則在保鑣陪同下，冒雨到銅鑼灣東角Laforet巡舖。其實過去曾有報道指李嘉欣多年來對細心照顧她的大劉從未忘情，早前她在上海公開盛讚大劉，更形容對方是自己「生命中的最大驚喜」，反而絕口不提許晉亨，所以許晉亨能否打破嘉欣快閃戀的宿命，成為對方另一個生命驚喜，相信也要諗計救急。
採訪：張俊銘
攝影：陳順禎、娛樂突發組
