恒生指數終於玩變天，睇怕小初又要返屋企溫吓習，睇吓遊戲有冇新玩法先得。
另外，經紀黃日前講到，上海電氣（2727）姐妹公司上海集優（2345），唔怕上海電氣有董事被查事件波及，可以博反彈之後，上海集優果然生性，股價拾級而上，至昨日再升1.96%，至2.60元。
昨日就輪到上海電氣證實有董事被查後復牌，雖然公司講明無資產受影響，兩位仁兄又無咩點理公司，但隻股有理無理都照樣被質，跌咗成10.53%，收2.55元，成交股數1.05億股，金額2.76億元。不過經紀黃話上海電氣下周公布中期業績，照計公司上市無耐，業績應該見得人。
經紀黃繼續堅持無有怕，睇定啲，夠膽的話，更可以博反彈㖭，佢話一兩個董事，對咁大間企業影響有限，短期投資者或會對公司企業管治信心有所動搖，但都係一句，大陸公司呢類事情實在司空見慣，昨日芬佬勁沽之時，同樣又有芬佬出嚟接。
慕容小初