講明先，今日介紹嘅抵食舖無豪裝，去得幫襯，預咗食一餐家常便飯。四人入座，順德小炒每碟$15，份量超大，去是但一間大牌檔，細細一碟起碼屈你六、七十蚊。平未必好味？放心喎，今次主理順德菜嘅師傅攞過多個國內美食獎項，埋枱開飯，保證你食到一餐正宗順德菜，埋單計數6碟餸$90、4個靚仔$12、茶芥每位$5，加埋一$140可以拍吓籮柚閃，仲想點？
記者：黃若茵
攝影：楊錦文
順德菜不務花巧
好多人用「食不厭精，妙在家常」、「魚米之鄉」、「食在廣州，廚出大良」、「中國廚師之鄉」等等讚譽順德菜，或者你覺得讚得好行貨，但食慣順德菜嘅人就知道無誇大，因為順德菜特色在不務花巧，善用新鮮平凡食材，靠仔細工序，煮出食物原汁原味，即使係家常菜式，都要做得精細，令人感受食物嘅清、鮮、爽、嫩、滑。「東海漁村」大廚太陽哥係正宗順德人，佢好猛料，曾多次參與國內美食大賽，2002年就以一味煎焗鮮魚嘴贏得「北京美食節飲食大獎」、「順德美食節大獎」，「我喺順德學廚，順德人對食物要求好嚴格，菜式一定要新鮮爽滑，嚟緊10月我會再去順德參加美食節，每年都有幾百個食肆參賽，希望今年我可以靠一味水蛇脫穎而出啦！」
大廚來頭不小
「東海漁村」喺香港開張兩個月，但太陽哥喺澳門老早響朵，「我喺澳門黑沙灣都有間順德菜館，好多名人幫襯㗎，叻哥、洪金寶、元彪都係熟客仔，佢哋好鍾意食我嘅魚嘴同其他小炒。」「東海漁村」雖選址九龍城呢個美食天堂，但舖位所在比較偏僻，附近只見車房少餐廳，講真都幾難搵吓，不過太陽哥無擔心：「我哋做外來客居多，特別係啲鍾意捐窿捐罅搵好嘢食嘅客人，每晚8點過後，成個場爆晒㗎！加上我哋開到半夜3點，啲客食飽就大班Friend傾偈吹水，傾到打烊先至走㗎。」見餐廳魚缸入面有啲平日少見嘅魚，八卦問係乜料，太陽哥話：「呢啲係西江野生魚，部份品種好似骨魚咁，喺香港好少有。供應商就喺西江即撈即運貨到香港，我隔日就要入一次貨，呢度所有河鮮都係即叫即劏，好新鮮。」
必食河鮮
香港正宗順德菜館唔多，因為順德菜用料平凡，無鮑參翅肚呢類貴價菜，菜式唔可以定價太高，生意就自然難做。順德菜工序比一般中菜繁複，功夫精細，曾有多位順德名廚被欽點為國家級御廚，據說就連聯合國總部的廚房內也有順德人師傅坐鎮。
順德向有「魚米之鄉」之稱，食材當然唔少得新鮮嫩口嘅河鮮，順德境內河流交錯，河鮮特別多，較大眾化嘅有鯪魚、鯇魚、大魚等，身價較高嘅則有骨魚、黃骨魚同花錦鱔等。河鮮有多種煮法，太陽哥話：「黃骨魚同埋骨魚用豉汁蒸最好，魚肉本身夠香，蒸就夠晒原汁原味；花錦鱔就有好多做法，頭尾可以燉湯，魚身就可以燜、焗、蒸。」
金牌煎焗鮮魚嘴$15
太陽哥得獎菜式：「𠵱家好多餐廳都用冰鮮魚嘴，我就用新鮮大魚魚頭，一碟魚嘴用咗3條魚㗎喇。魚嘴先用秘製醬料醃過，煎香後再焗，食落一啲腥味都無。」
煎焗滑豆腐$15
太陽哥：「我將豆腐兩邊煎至金黃，然後用上湯打芡，個芡唔會做得太鹹或太甜，咁先可以食到豆腐本身嘅清淡香味。」
家鄉煎魚餅$15
太陽哥：「新鮮鯪魚起肉剁碎加果皮，打魚膠好攰㗎，所以每次只可以做小量，賣晒先再做，咁先保證到鮮味，唔怕放耐變霉變腥。」
碧綠炒三果$15
太陽哥：「簡簡單單清炒，將腰果、百合、西芹、銀杏、馬蹄炒埋一碟，唔加太多人工調味，清炒好在可以令食材味道自然散發，保留到食材爽、脆、腍口感。」
大良炸鮮奶$15
太陽哥：「鮮奶加入糖、椰漿等調味，雪凍雪硬再點粉漿脆炸。鮮奶味道一定要調校得好好，因為食嗰陣唔會點其他醬汁，味道甜甜哋當甜品食唔錯㗎。」
欖菜肉碎炒椰菜$15
太陽哥：「欖菜醃製過，會帶少少鹹味，加肉碎一齊炒可以令清淡椰菜變得更惹味。椰菜新鮮就一定爽口，仲有呀，一上枱就好快啲食喇，放耐咗椰菜變腍就無咁好味喇。」
食客有Say
搵食攻略
東海漁村（27188993）
地址：九龍城打鼓嶺道70-72號地下
營業時間：11:00am-3:00am
交通：九龍塘地鐵站乘的士約$20，惠顧晚市有代客泊車
座位：約200個
人均消費：約$100
有着數：晚市9折，10:00pm後消夜8折
最好賣：煎焗魚嘴，日賣50份
註：6款菜式$15優惠價由即日起至8月18日