今日PG家長指引，皆因講嘅係高難度拋酒樽危險動作，小朋友喺屋企千祈咪亂學。做咗1年調酒師嘅Vishal係尼泊爾人，經驗雖淺，但已練成一身拋樽好武功：「平時一得閒我就會練習㗎喇，一日練幾多個鐘？好難講喎，忙起上嚟可能成個禮拜練得幾次㗎咋！其實拋樽唔算好難，好多調酒師都識，不過雙手一定要靈敏。拋樽要訣在於Timing，拋樽同接樽時間要配合得好好，否則一地玻璃碎。」見Vishal左手交右手，右手接左手，好似好輕鬆啖定，問番先知原來拋樽都好消耗體力，Vishal扯晒蝦咁話：「唔停咁拋會好攰㗎，一來雙手要不停咁郁，二來要全神貫注，拋五、六分鐘我已經流晒大汗。」
Vishal6年前嚟香港，原先做室內設計，後尾轉行做調酒師，兩份工作比較，佢話Enjoy𠵱家份工多啲：「以前嘅工作好單一，𠵱家有趣好多。做調酒師點止要調酒，我仲會同客人傾偈，溝通好重要，見到客人開心，我都會好滿足。」有如此好武功，平日喺客人面前拋吓樽都夠開心啦，「其實平時好少喺客人面前表演㗎，因為拋樽根本對調校一杯好酒無實際作用，只有喺酒吧搞Party嗰陣，我先會特別喺客人面前表演。我亦唔會喺酒吧以外嘅地方表演，因為酒吧吧枱入面唔係硬地，所以唔怕打爛玻璃發生意外。」
記者：黃若茵
攝影：陳陶鈞
ThaiMojito$80
舂碎鮮青檸、西瓜、薄荷葉，再加蘭姆酒及梳打水。味道以酸為主，入口薄荷葉的冰涼味道慢慢在口腔散發，頗清新。
香草肉碎豬肉沙律$55
豬肉碎跟泰式香草及指天椒碎一齊炒，齋食肉碎好辣，用生菜包住肉碎一齊食，清新得來中和辣味，更食得出肉碎的香口。
ThaiSangria$80
混和果汁、黑櫻桃酒、蘋果酒，甜甜的甚有熱帶風味。Vishal加入紅酒，不但令酒味更濃烈，亦為飲品添點神秘的深紅色。
KlongBar&Grill（22178330）
地址：灣仔駱克道54-62號博滙大廈地下