馬季於9月第2個星期日才開鑼，距離第1次試大閘，也還有兩個星期，季初試閘是很重要的參考指標，試閘跑得好，在第1、2個回合的賽事中，也多數有好成績。不過，所謂試閘好，不等於要贏，因為名次其實並不重要，最緊要是姿態輕鬆、騎下去有反應，蘊含勁力就可以。
足球也差不多吧？眾名牌球隊季前遊埠踢友誼賽，宣傳賺錢兼試試陣而已。不過，利物浦的「試閘」又真是幾嚇人，歐冠外圍賽之前，3仗熱身全敗，其中兩場更食蛋。而贏海法那一場，大話夾好彩，一班馬對着低兩班對手，騎盡九牛二虎之力至贏個鼻，真要重新估計了。
車仔表現似樣得多
英超未開鑼先踢社區盾，利記將對車路士，車仔的熱身賽雖然有贏有輸，但就似樣得多。不過，我覺得最有興趣是摩連奴個新look，舊年得過名人最佳髮型獎，家陣竟然宣稱要擺戰鬥格而鏟平頭，實質是否因為兩邊額角「力爭上游」呢？希望今場多播幾個摩帥closeup吧！
張美德
記者出身的著名馬評人，現職馬會節目主持人。