侍仔：噚晚同班朋友去中環，打算去睇吓班發夢7隊有咩咁把炮，但去到佢哋已經返晒上房。
招積域：你都好得閒吓喎，放假都走落去同班𡃁仔等明星。
菠蘿文：你又係無帶到女友落去啦？
侍仔：唔係喎，佢叫我帶佢落去睇㗎。不過等咗幾個字就放棄，因為太熱啦噚晚。其實佢都係癡情Fans嚟㗎。
招積域：電視都有得睇，報紙又有記者幫我哋做狗仔隊跟。
菠蘿文：自己落去都係貪得意嘅啫。
侍仔：泰利做咗英格蘭隊長，覺得係實至名歸！
林伯：泰利都無個人魅力，林柏特就唔同啦。佢有俊朗外表，又有戰績支持。
菠蘿文：咩嘢戰績？唔係世界盃吓話？哈哈哈！
有實力只欠俊朗外表
林伯：泰利個樣儍頭儍腦，擺個樣出嚟點叫人服呀？碧咸、施文先至係似隊長，又有樣又有魅力，令人信服。
侍仔：令你呢個球迷信服，定係令英格蘭隊信服先？隊長係為球隊而設，佢可以係一個球星，但先要令球隊信服。碧咸踢到嘔好叻咩？唔覺囉！
林伯：算，我唔同你拗，我認為隊長個人魅力最緊要。
侍仔：你仲有咩嘢好拗？隊長都選咗出來啦。
林伯：我係一個死硬派英格蘭球迷，咩嘢都唔可以阻住我去支持自己偶像！
侍仔：英格蘭喺麥卡倫領導下，一定有一番新氣象啦！
林伯：你咁樣講就啱聽啦！麥卡倫深得球員同球迷歡迎，以前佢都同做正領隊差唔多啦，咩都係佢管晒嘅。
招積域：我都唔覺得佢有何特別。你話佢帶米堡突出咩，但我覺得艾拿廸斯仲勁啦，將一班失意軍人搞番生，仲可以殺入歐洲賽㖭！
高洛文