張智霖同老婆大人袁詠儀（靚靚）早前造人成功，靚靚個胎兒已經6個月，預產期係11月。兩個就嚟做父母，馮仁昭都戥佢哋高興。
前晚張智霖喺中環蘭桂坊街頭狂奔，問佢趕住去邊，張智霖話：「攞嘢食。」原來佢趕住去附近嘅翠華茶餐廳買外賣畀靚靚，拎完外賣之後，張智霖又滾水淥腳返上車，將新鮮嘅外賣遞畀坐喺司機位旁邊嘅靚靚。只見靚靚急不及待攞杯凍檸茶係咁篤，飲得好滋味，仲遞高畀記者睇晒幸福。阿媽教落大肚婆唔餓得，唔怪得之靚靚咁心急，之後佢哋就開車返屋企歎消夜，心情大好嘅靚靚仲同記者揮手byebye㖭！
袁潔瑩晒排骨
除咗張智霖兩公婆之外，前晚袁潔瑩同男助手都喺老蘭出現後，約11點幾，瘦骨嶙峋嘅袁潔瑩離開鏞記大廈，做埋柴可夫司機送友人離開，臨走前仲好心提醒記者：「小心天雨路滑呀。」
同場加映阿B鍾鎮濤同友人揸車經過，仲有趙式明同名模周倩圮㖭，好鬼熱鬧。
