今季德甲爭逐預計相當緊湊，拜仁慕尼黑在聯賽盃演出未見鶴立雞群，而雲達不來梅、漢堡以及史浩克04等亦會力阻拜仁達成聯賽第四度登上「三連冠」的願望。
今晚有線球彩台直播場次漢堡對比勒費爾德係我心水。回顧上季，漢堡榮膺德甲「最強之盾」，全季只失30球。防守如此出色，難免後防主力被撬走。幸而只有中堅雲拜頓轉投拜仁，其餘常規正選全數留低，有望可保上季防守穩定佳績。中場人腳無甚變動，鋒線則為全新組合，活力應不成疑，但肯定需時磨合。
比勒費爾德攻力弱
漢堡今日對手，正正係上屆德甲「最弱之矛」比勒費爾德。全季3,060分鐘比賽，只曾試過34次慶祝入波滋味，少得可憐，作客成績亦排倒數第二！佢哋之所以能成功護級，全賴在主場交到功課。
不過，首席射手保基及正選翼鋒賓圖均已離隊，進攻威力更令人擔心！新簽前鋒艾漢科夫未必在今仗以正選上陣，可能只靠兩名上屆季中加盟的域尼亞列夥拍曼尼廸斯攻堅，可惜兩人上季都食白果，今場想入波就更難。
季初賽事，若然太熱其實不宜捧。今場敲入球細好分之餘，更有信心；另外推介波膽漢堡小勝1:0。祝大家旗開得勝！
有線球彩台主持強尼
電郵：[email protected]