王菲（右）同老公李亞鵬喺上海開嘅酒吧生意唔錯，每年為佢哋帶嚟百萬人民幣收入，估唔到好友劉嘉玲（左）都唔執輸，早前同友人合資1,600萬人民幣開咗間MuseClub酒吧，樓高兩層，面積共1,500平方米，𠵱家裝修緊，下月底開幕。酒吧經理楊偉鴻仲同記者講老闆娘劉嘉玲野心好大，呢間仲未開張，已經計劃開第二間分店，仲話佢會長駐酒吧，招呼圈中友人夜蒲㖭。