去潮州菜館打冷，食個凍蟹加鹵水鵝片，動輒都要成嚿水落樓，感覺好似幾高消費吓！其實潮州人出名慳家，平日嘅家常菜，同樣有雞有蝦又有蟹，都係10蚊一味。今日搵來潮州菜師傅張立群，示範點用30蚊煮出3個特色潮州家常菜。
記者：梁學文
攝影：周旭文
鳴謝：潮館
金華四寶蔬蠔香清爽
價錢：$10（4人份）
需時：30分鐘
菜蔬：娃娃菜/小棠菜/蘿蔔/南瓜各1両
菇類：冬菇3隻、草菇2隻、雲耳2両、
調味：生粉2茶匙、蠔油2茶匙、水半碗、鹽1茶匙、糖1茶匙
1.灼菜
先將菜蔬輕輕灼熟，然後再加入鹽及糖作調味。
2.隔水蒸
然後將菇類及菜蔬材料，排好隔水蒸15分鐘。
3.埋芡
最後用蠔油、生粉、水、鹽及糖埋芡即成。
貼士：
灼菜時切勿灼得太熟太腍，否則就會無口感。
鴛鴦雙棗 彈牙可口
價錢：$10（4人份）
需時：40分鐘
材料：蝦4両、蟹1隻、腐皮1塊、馬蹄2粒、薑半両、油適量
調味：胡椒粉/麵粉各2茶匙、鹽1茶匙
1.打蝦膠
蝦肉洗淨加馬蹄、薑粒打成蝦膠；胡椒粉、鹽調味。蟹煮熟後拆肉備用。
2.唧丸製卷
蝦棗唧成丸；做蟹棗就將蟹肉加入蝦膠之中，再用腐皮捲成條狀。
3.中火猛炸
蝦棗、蟹棗面拍麵粉，中火落油鑊炸；棗面轉金黃，轉猛火逼出油份。
貼士：
蝦膠要大力打，打耐啲會彈牙！
川椒雞香辣醒胃
價錢：$10（4人份）
需時：20分鐘
材料：雞肉7両、珍珠菜1両、葱1両
調味：川椒/生粉各2茶匙、魚露1茶匙、老抽/紹酒各半茶匙、麻油1/4茶匙、水3湯匙、油適量
1.爆香料
先將葱切粒，再用油輕泡，轉色後加入川椒粒炒香備用。
2.炸珍珠菜
油滾後先輕炸珍珠菜，待轉深綠色後撈起，然後輕泡雞肉至僅熟。
3.快炒材料
用川椒起鑊，加入雞肉同各種材料及調味料，兜勻即成。
貼士：
珍珠菜唔可以炸太耐，一落鑊就要撈起，否則會變黃唔好食。
受阿媽影響愛煮家常小菜
潮州人張立群煮潮州菜煮了14年，凍蟹鵝片等等高難度菜式通通難佢唔到，不過佢話最愛都係煮家常小菜：「我十幾歲來香港，偶然有機會學廚，煮咗十幾年潮州菜，差唔多款款傳統潮州菜都煮勻。不過我最拿手都係做家常菜，或者受阿媽影響，始終都覺得家常菜至係正菜。同埋喺屋企都唔使成日食貴嘢，一家人開開心心食一餐就夠。」
一提起屋企，堂堂一個大男人都不免流露出幸福的笑容。講到平時會煮咩畀屋企人食，佢就話最常煮肉類，因為潮州菜的特色係肉多過菜，但係都會煮番啲菜平衡番，均衡飲食都好重要。
四寶菜 高纖又健康
「其實平平哋買肉買菜都可以煮到餐潮州特色家常菜，好似前幾日屋企做節，阿媽就整咗蝦棗同蟹棗，成家人一齊食都係10零蚊又平又抵食。平價菜其實都好有營養，好似四寶菜咁，一次過有4種唔同嘅菜，可以吸收多啲纖維，排便都暢通啲。仲有夏天好多時都無咩胃口，所以用潮州人常用香口嘅珍珠菜做配菜就最好，因為炸過嘅珍珠菜勁香口，大人細路都鍾意食。」