澳門上個月錄得557宗住宅買賣，比6月嘅342宗，大幅急增62.9%，超過八成買家係本地客，聽落冇乜特別，但係根據過往紀錄，每次樓市大升嘅時候，都係由港客同外資帶動，本地客只係屬於第二同第三手接貨嘅買家。今次本地客咁進取，都算少見。中原（澳門）執行董事郭朝隆認為，澳門樓巿已進入復蘇期，仲係由優質靚盤主導。
中原（澳門）營業董事賴文傑就話，7月份買賣最多嘅係100萬元以下住宅單位，約佔一半；而樓價100萬至200萬單位，比例為35%；至於200萬蚊以上就有逾15%。
賴文傑指出，一手及優質樓能主導巿場，除咗係買家睇好澳門前景外，最主要係博彩業發展得如火如荼，博彩從業員大增，造就咗一大批實力買家。
另外，有啲用家反映，擔心部份二手樓會涉及大廈管理糾紛、樓宇失修同結構等問題，所以唔敢買二手貨。