小小超李澤楷買《信報》塵埃落定，未來半年，佢將會努力學做報紙，同班《信報》員工磨合。呢班員工，已經收到以新公司「信報財經新聞」發出嘅轉職合約，今個月14號限期前要簽番畀公司。據了解，新合約條件冇點變，年資同公積金、強積金都唔會中斷（《信報》公積金幾吸引，老闆供10%），事實《信報》𠵱家嘅老臣子唔多，大多數係新人，所以改合約都冇乜大影響，相信大家都會簽，反正佢哋之前減年終酬金時都簽過一次。
唔會變區域財經報
有份內地報紙《21世紀經濟報道》神通廣大搵到小小超做訪問，有幾點可以轉述吓。小小超證實咗：一、半年後再決定股權比例，佢希望增持（現時佢揸50%，林家揸50%）；二、《信報》唔會變做一份區域財經報，只會集中力量在香港；三、以離岸信託公司形式入股，唔構成跨媒體擁有問題，符合香港法例；四、冇計劃買TVB，未來半年只集中全力搞報紙同音樂生意。小小超仲話呢半年會跟林生林太學習點辦報。
不過《信報》有部份員工仍然希望公司詳細啲交代，以釋疑慮。事關禮拜二單交易曝光，林太下晝只係同少數高層員工傾過，之後總編輯同班手足講咗份新聞稿內容，其他詳情就欠奉。所以，聽講林太今日會再返公司見吓啲夥計。
大公關滯留希斯路
有好多人唔明點解小小超肯出兩億幾買，知情者就咁分析，《信報》個招牌其實好靚，尤其喺內地，他日去內地賣財經資訊，呢個招牌好有用。其次《信報》現時賣6萬紙左右，唔算少，但好多開支其實可以節省，例如外判印刷，馬上可以收多啲彩色廣告，又減啲支出，條數有得諗。當然小小超大把水，亦係出手闊綽一個原因。
講開小小超，佢位大公關胡雪姬一家大細，正在倫敦，啱啱遇上希斯路機場大癱瘓，佢哋兩夫婦在機場呆等。胡雪姬個女會考放榜，成績好好，有二十幾分，中英文都A咗。