侍仔：日日都係發夢7隊，有無啲嘢係啱我哋唔睇籃球嘅人睇嘅呢？
招積域：唔係發夢7隊，係夢幻7隊呀！不過陣容同03年皇馬相比，就真係差得遠囉。
菠蘿文：一定係啦！皇馬個個天王巨星，夢幻7隊都係一班名氣不太大嘅球員。
侍仔：歐冠外圍賽蘇超赫斯輸咗首回合喎。
招積域：都唔明白啲人點解咁鍾意睇2線波，係咪睇人哋唔識嘅就當係專家？
菠蘿文：呢個可能係原因啦，世界上咁多唔同嘅足球聯賽，人識你都識，咁咪顯唔到自己喺班朋友入面與別不同囉。
侍仔：你啱！咁我識晒低組別聯賽，我咪可以做專家？去各大報章效力？
招積域：你都係安份繼續做侍仔啦！
菠蘿文：講開赫斯，我認為呢隊波同以往一鳴驚人嘅球隊一樣，都係去到歐洲賽外圍賽階段就香嘅一類，真箇地頭蟲難望成龍。
侍仔：好似去年愛華頓同愛斯賓奴嘅例子咁啦，吓話？
一鳴驚人例衰收尾
招積域：愛華頓嘅成績真係令我吃驚，首回合竟然可以俾人大數！未踢之前買咗高特立同雲達美廸呢類筍貨㗎，以為可以過頭關。
菠蘿文：或者欠缺大賽經驗，又可能係球員休季之後，狀態未可以keep到啦。始終咁嘅球隊，打嘅都係士氣波，無士氣搭夠，即使有好球員加入都唔會有好出路。
侍仔：赫斯都係臨尾俾人追番啫。
招積域：希望前景真係樂觀啦，佢陣中呢班8國聯軍，雖然無咩人識，但其實有實力嘅。
菠蘿文：總之一鳴驚人嘅球隊，出到歐洲賽唔會有好下場㗎啦！
文︰高洛文