帶Notebook出差，經常嫌唔夠電用，最慘喺飛機上面，諗住睇埋套《KINGKONG》，未到結局已冇電，無癮！好彩SONY剛推出新VAIO，包括兩款以高電量、輕巧為主嘅TX36及TX37，其最長使用時間能撐足10小時咁耐，莫講話煲碟咁簡單，直頭拮USB幫我部PSP、NDS叉埋電都仲夠，唔好話搭飛機，就算喺屋企做足一日嘢，再煲碟打機Relax埋都仲得！
記者：陳國輝
攝影：伍慶泉
ImageGirl：Cody
兩款機最大分別，在於處理器、主記憶體以及硬碟容量都唔一樣。TX36屬入門級機種，分唇冇咁勁，但勝在價錢較平，$14,980就有交易；相比起TX37，佢採用更快嘅Centrino1.20GHz處理器，同時仲內置1GBDDR2SDRAM以及80GBHD，打機煲碟更啱！兩者外形極之相似，不過TX37配備咗黑、白及紅色3種機殼，比起齋白色嘅TX36更搶眼！規格唔同，當然價錢亦唔一樣，TX37比TX36貴多二千蚊，一分錢一分貨，算各有優點啦！
AV專掣任你舞
身為「長氣」Notebook，TX37除咗配備一排7,800mAh鋰電池、容量比一般Notebook多出約2倍之外，仲配備多種影音設備，最適合用於打機、睇片或者聽歌等超食電嘅分唇。喺機身旋轉軸，特設一列AV專用掣，只要開着最左邊嗰一粒「AVMode」，電腦隨即會進入《VAIOMedia5.0》介面，你可以用Mouse或AV專用掣嚟播歌、睇碟，用落就知幾方便。小記覺得玩法類似微軟嘅《WindowsMediaCenter》，但若然將兩者比較，個人就比較鍾意《WMC》嘅全面功能，佢不單止能接收電視、FM，甚至可錄影節目，幾乎玩齊晒家電功能㗎！
喺VAIO系列當中，TX37已算纖巧細部，起碼其實際重量只得1.25kg，厚度更只有28.5mm，帶佢出Trip「上機」絕對唔會嫌麻煩！機仔細細之餘，還具備11.1"闊屏幕，畫質達到1,366×768解像度，小記試過睇勁多暗位嘅《伊莎貝拉》DVD，發現色彩尚算鮮艷，但畫面唔夠細緻；至於音量就認真大聲，只怕拎上飛機睇片會俾人投訴，還是用耳筒較適合！
防跌兼識認手指
帶埋部Notebook出街，有時最怕就係唔小心跣咗落地，莫講話冇咗大嗱嗱皮幾嘢，更慘係裏面啲重要資料統統冇晒，到時真係喊都無謂！為解決呢個問題，機內特別加入幾項保安功能，令個人資料得到更佳保護。首先，TX37及TX36均配備一個3D加速感應器，當電腦意外跌落地，感應器會自動將硬碟磁頭移至安全位置，確保資料獲妥善保護。另外，TX37更具備指紋驗證（Fingerprint）及TMP保安技術，前者利用玩家嘅指紋特性嚟開機，確保他人不能盜用；後者則以密碼形式將重要資料鎖住喺晶片，即使電腦受惡意入侵，資料仍得到保護。
小知識
所謂Fingerprint，意思係指紋驗證咁解！假如你部電腦儲存咗好多重要資料，咁就要一套保安程式幫你鎖好，防止外洩。比起一般密碼鎖嚟講，好處有兩個：一來毋須刻意記住密碼，二來撞正同一指紋嘅機會率近乎零，可以話絕對安全。不過，缺點係指紋感應器喺長時間下容易氧化，會引致損耗或失靈。
機身裏面統一採用咗白色，雖然機仔細細，不過幾好㩒。
$16,980（TX37）
$14,980（TX36）
