近兩年冇成交嘅大潭龜背灣洋房，聽聞啱啱破悶局，瑞安建業行政總裁黃月良揸咗近10年嘅單號屋，以約6500萬賣出，間屋4020呎，呎價超過萬六蚊。原業主黃月良喺97年中以6450萬買入，𠵱家平手離場。
龜背灣雖然只有幾幢洋房，過去幾年成交又唔係多，不過由於好多名人都係現任或過氣業主，好似已故歌星張國榮，同啱啱生咗個女嘅歌星王菲，仲有太平地氈董事，差唔多個個業主都係名人，所以好出名。
講開貴價樓，電訊盈科主席李澤楷私人發展嘅山頂歌賦山道28號，上個月以近1.5億賣咗7號屋，呎價兩萬四，買家身份終於曝光，登記者中明發展有限公司，董事叫馬楚龍，報稱住址係山頂柯士甸山道24號。
另外，噚日市場仲有兩單過千萬成交，壽臣山碧麗閣頂樓連天台，1650呎，成交價1570萬，呎價9515蚊。舂坎角海天閣A座低層2室，1825呎，以1552萬易手，呎價8504蚊，原業主92年以715萬買入，升值1.2倍，勁賺837萬。
電郵地址：[email protected]
