地鐵噚日公布中期業績，成績遠超預期咁好，行政總裁周松崗紅光滿面行入場，一路笑住口冇停過，對一眾攝記嘅要求更加有求必應，要笑容有笑容，要動作有動作，90度角擰側個頭都冇問題，跟手再中英文交替滙報業績。雖則全場中氣十足，但唔係個個識欣賞，事關坐頭排嘅一男一女，都先後瞓着咗。
地鐵派成績表，次次程序都係大同小異，由坐位到背景，同上次幾乎可以話係翻版，只係估唔到連講嘢食螺絲嘅，都係同一個人，就係總經理梁陳智明。上次全年業績時，佢將公司旗下嘅「都會馬尺」，講成都會「馬」「尺」，今次就俾堆數字考起，但佢都好有急才，即刻講咗句「大家都知我講緊乜係咪？」
上蓋物業唔准用「站」
唔講唔知，地鐵同長實合作發展調景嶺站上蓋「都會
馬尺」，曾為個名爭議。長實當然想用盡地鐵站上蓋優勢，但地鐵就一定唔准物業名有個「站」字；長實都好叻，諗到用個日本「馬尺」字，即係站，可惜大家都唔識讀，所以唔好怪梁太。
地鐵盤數破晒紀錄，主要係有兩個樓盤入賬。地鐵發展地產真係好好賺，發展商包晒所有成本，賣樓利潤佢就分七八成。不過，下半年少好多項目入賬，條數未必可以保持。現時地鐵全力搞合併，希望一兩年內吞併九鐵，到時股價可望有啲刺激，但係未刺激前員工先受害，因為兩鐵為免合併後大裁員，基本上已經唔請人，凍結晒人手。
地鐵中期息派得唔多，相信係留起啲錢以備合併用。上市嗰陣有成60萬個小股東，個股價升高之後唔少人套現走人，家吓只得番30.6萬股東，俾有百萬個小股東嘅中行大幅拋離。咁30.6萬個股東，睇合併份上，今次就收順啲啦。
李華華