通常利物浦嘅救世主都會係謝拉特，估唔到日前歐冠盃外圍賽對海法馬卡比，救番「紅軍」嘅會係謝拉特「替身」、後備上陣嘅麥克干沙利斯，佢上陣兩分鐘後建奇功，真係令球迷對佢印象大大加深。
22歲嘅麥克仔到比賽後段先至入替謝拉特，估唔到上陣短短兩分鐘，就幫利物浦射入反敗為勝嘅一球，一控一射都盡顯呢位智利小將功架，喺咁重要時刻射入咁重要入球，點會唔令「紅軍」球迷對佢留下深刻印象呢？
講到麥克干沙利斯，其實佢上季已經加盟利物浦，因為申請唔到工作證，最後借番去西班牙效力皇家蘇斯達，而去季就幫皇蘇射入咗5球，尤其季尾連續3場對皇家馬德里、桑坦德同埋維拉利爾都有入球，算係球隊護級功臣之一；今季成功攞到工作證歸隊，第一場正式比賽就立大功，睇嚟前途無可限量。
左中場位置爭崩頭
現時利物浦左路球員有唔少人腳，好似懷斯、基維爾、辛頓，𠵱家再多個麥克干沙利斯，對賓尼廸斯嚟講梗係好啦，有咁多球員可供選擇，不過左中場個位就爭崩頭囉。反而，「紅軍」後防兵源就有啲唔足夠，尤其季前熱身賽到今仗對海法馬卡比都有失球，相信後防線先至係賓尼廸斯最頭痛嘅問題。
「利物浦用咗好長時間幫麥克干沙利斯喺英倫申請工作證，終於都搞掂，今次佢入咗加盟紅軍以來第一個入球，而且仲係替球隊反敗為勝，睇嚟今季會有唔少上陣機會。」