前輩專欄作家「今聖嘆」之公子程鼎一喺八月一號起接任國泰航空公司嘅企業傳訊部，屬總經理級。程公子一表人才，六呎昂藏，話佢孭得起個鼎，好多人會信。今聖嘆來自湖南，娶日本太太，程公子話雖然有一半日本血統，但自認係百分之二百嘅中國人。娶了台灣太太，一定唔會去中國化。
前輩遜哥比今聖嘆年紀細，視程公子為世姪，佢話當年與今聖嘆飲酒，一聽到今聖嘆講日文，就知佢有十分醉意，要送佢返屋企，遜哥跟住考我哋：廣東話「滾水×腳」，第三個字點寫，左丁山一時為之愕然，諗起有「淥」、「碌」；遜哥話：「全部都錯，查過康熙字典，係『熝腳』，寫『滾水熝腳』就啱嘞，好多廣東話其實係古字，源遠流長，一啲都唔俗！」咁就以後記住嘞，走去買番本康熙字典先。「淥」係水清嘅意思，「淥腳」完全唔啱。
國泰請食飯介紹程鼎一，送別黃家倫，估唔到又學到嘢，呢類飯局，多去無妨。第二日，睇《星島日報》一段半版咁大嘅訃聞，仙遊者九十有餘歲，遺下一妻九子三女二十七內外孫一外曾孫女。本來睇訃聞係得個知字啫，遜哥話一時睇唔到馮鳳三嘅訃聞，就唔知道呢位前輩專欄作家去年逝世。睇呢段《星島》訃聞，領會到香港生育率下降得厲害。以仙遊者為第一代，佢有十二個子女，證明第一代好重視添丁，到咗第二代十二人，人人結婚，產下二十七人，出生率已經大大下降，進入「一個嬌」、「兩個妙」時期。第三代呢？以第一代九十有餘歲推算，第三代怕有二十五歲以上啩，二十七人之中，到目前為止只有三人結婚，生下一名第四代。以此推算，香港嘅第四代人係少過第三代人，整個社會人口會縮減，不是增加。
一段訃聞，睇到社會變化，只有左丁山咁八卦嘅人，先至會連訃聞都留意埋！其實研究家庭社會學嘅學生，唔睇訃聞，就會錯過了解中國人嘅家庭結講及社會人脈網絡嘅機會。