睇完我哋投資特攻隊嘅華度兩個穩中求勝嘅重心推介，又點會漏咗鍾意以小博大嘅波友；就提供一條4串5，全中有37.3倍，應該可以搵番啲賭本迎接英超開「咧」。
星期六日職聯有9場波下午開波，應該都幾受波友歡迎。頭關先取川崎前鋒入球大為熱膽，前鋒暫列榜首，攻力強係最大原因，一個我那霸和樹就搞到對手頭都大埋；前鋒聯賽8場主場，只有1場冇波入，今場對住防守一向麻麻嘅水手，入波「easy執」啦。不過，前鋒後防同樣都幾恐怖，16場聯賽只有3場無失波，既然前鋒入得又失得，博個1.55倍入球大，穩過主勝啦。
另一場有啲分頭選擇，博大宮松鼠作客贏大阪櫻花；睇過櫻花前嗰場主場大敗畀FC東京1:5嘅片段，櫻花後防真係同豆腐冇咩分別，門將甩手、後衞失位，差唔多可以犯嘅低級錯誤都幾乎犯齊。松鼠仔近期戰績唔差，近4場贏咗3場，有2.2倍分頭，串得過。
博基爾馬諾克單W
蘇超上個禮拜爆到七彩，兩大班霸格拉斯哥流浪同些路廸都贏唔到，格流主場竟然畀登地聯迫和2:2，不過波友唔好以為登地聯好勁，嗰場波格流攻勢多到不得了，只係登地聯後防好似「師傅到」，又包空門，又中楣中柱，登地聯先可以攞一分。今次登地聯作客基爾馬諾克，就唔信登地聯可以再咁好運，一於博基爾馬諾克單W。
最後一場揀周日法甲，博馬賽贏唔到雷恩；馬賽列貝利「扭計」，唔多唔少對球隊都有影響，雷恩首場失利，作客轉攻為守，發揮可能更好，讓球盤博下盤。文：牽牛