一個傳統蒸腸粉的蒸盤，每次只可以蒸兩碟腸粉，有八十多年歷史的老茶樓「蓮香」，每日則賣100碟腸粉以上，腸粉師傅阿鄺跟常人無異的一雙肉手，每日就要給熱騰騰的蒸氣燙手五、六十次，「蒸腸粉最難整係粉皮，個蒸盤唔平，米漿又熱，所以要快手推勻米漿，等米漿分布平均又唔太厚，好難㗎。我做咗廿幾年，點會辣親自己？」「蓮香」的腸粉一直不以滑溜取勝，甚至有點粗糙嚡口，但粉皮那股濃濃的米味，其他食肆難尋，鄺師傅一臉不在乎地說：「腸粉點解一定要滑啫？𠵱家人人都話腸粉要滑至好，我就偏唔做，要整滑啲腸粉好易㗎咋，米漿加多啲水，搵機攪多幾個鐘，幾滑都有。我係要整得特別啲，腸粉最緊要有米味，少少粗唔怕！」好的米漿，水與米比例很重要，秘方不便公開，總之想米味香濃，就一定要水少米多，至於調製豉油，師傅一樣有秘訣：「我自己調製豉油，用珠江橋牌生抽王加雞精加糖，再加啲秘密材料煮，無一般腸粉豉油咁甜，鹹啲啲先好味。」多得他每朝預備好豬膶、牛肉、鮮蝦等餡料，多得他的一雙肉手，茶客才可以日日吃到新鮮的腸粉。
記者：廖秀娟
攝影：楊錦文
牛肉腸$16
牛肉腸是腸粉三寶之一，好味在牛肉夠鮮味。
叉燒腸$16
餡料全部用即日叉燒加葱段炒成，鄺師傅嚴正聲明：「唔係用淨叉燒㗎。」
蓮香（25444556）
地址：中環威靈頓街160-164號地舖