昨午3點半過後，歐洲傳來驚住恐怖襲擊新聞，英法德股市齊跌個幾兩個巴仙，殃及港股。恒指埋單報銷124點。
突發事件，防不勝防，亦唔驚得咁多，夠膽喺人人驚到變成鵪鶉之時撈貨，更可能賺到笑。例如去年7月7日香港時間傍晚，倫敦爆炸，第日港股恒指最低13920，到𠵱家，唔覺唔覺升咗3302點。
建行C輪4578：恒指服務公司今日公布列入恒指成份股H股候選名單，建行（939）係必然成員，雖然可能要到9月份先落實成事，但點都有啲啲刺激，真正較大刺激要到9月指數基金跟成份比重埋位買貨先至出現。
買定建行C輪冇蝕底。前日講過，4556數據靚啲（結果昨日正股跌1格，隻輪都升1格），4578亦可以諗吓。4578昨跌4%，啱買。隻輪11月初夠鐘，輪價24.5仙，溢價3.2%，槓桿率14.4倍（有效9.8倍），引伸波幅23.5%。
滙控C輪4920：滙控（005）收141元，跌1.20元。等跌多1蚊幾毫，買C輪博反彈。正路之選係4920，12月初夠鐘，輪價73仙，溢價1.6%，槓桿率19.3倍（有效12.5倍），引伸波幅16.3%。滙控下周四除息1.17元，8月份到期嘅滙控C輪，有少少負溢價，就係因為滙控除息關係。揀遠期啲滙控C輪埋手，個心會定啲。
章盛