《蘋果波經》投資特攻隊今日首次登場，呢個欄目主要目的，係希望喺連場周末及周中賽事當中，搵出直播波以外，最值得出擊嘅場合；長線去睇，希望做到本「投資特攻隊數簿」有盈利。每次都會提供一熱一冷精選，今日頭炮，就趁英超聯未開波，仲係冇乜波睇嘅時候，向英冠波新特蘭埋手。文：華度
喺呢個21世紀年頭，仍然有好多「迷信」，而且唔單止我哋賭仔，英國嗰邊都一樣；最近就有研究指出，「黑貓」可以帶嚟好運。呢個禮拜六，英冠聯就有隻「黑貓」新特蘭喺主場出擊，追捧得宜，就分分鐘為你帶嚟財運嘞。
相信好多球迷，仍然記得新特蘭上季喺英超聯幾咁唔掂，輸到無晒譜；識得搵食嘅，已經係咁追捧佢哋對家，個個禮拜等收花紅。今季外號「黑貓」嘅新特蘭，降咗落英冠玩，就唔同講法嘞。
光明球場威力驚人
有番咁上下賭英國波經驗嘅朋友，都應該聽過新特蘭喺光明球場主場比賽嘅威力；上季打到咁曳，主場都唔識發惡，只有兩個原因：一係班波級數同超聯列強仍有距離，咩場都死；第二係個領隊麥卡菲根本唔掂，大前季降落英冠，都要打咗兩季至升得番上超聯，點知都係要即刻回降。
今季新特蘭兩戰兩負，周中就踢過一場主場波，0:1輸咗畀伯明翰。對於今季要追捧新特蘭喺英冠聯主場出擊嘅理念嚟講，未嘗唔係好事。
主場勝出率甚高
原因呢班波近幾季喺英冠聯主場勝出率甚有睇頭，前季，23戰得16勝4和3負，勝出率接近七成；大前季，勝出率亦有六成。投資特攻隊預計呢班波今季喺英冠聯，都應該至少有五成主場勝率。𠵱家1戰1負，勝率係零，呢啲咪叫做「炒落後」囉。
新特蘭周六繼續主場出擊，對手則係連續兩場打作客波嘅普利茅夫。普利茅夫啱啱作客贏咗升班馬高車士打，照計好難連續兩場作客波奏凱，呢場畀盡佢哋最多拎得一分走。
修咸頓單W值博
但以新特蘭球員整體質素嚟講，係可以秤高對手；對伯明翰時，雖然有主力守將卡達維受傷，但領隊兼主席「長人」昆尼，表明態度會繼續為球隊增兵，分分鐘喺呢兩日又有好手加盟；據昆尼所講，希望收購嘅目標人物都係前鋒人才，務求增強球隊鋒力，加強贏波本錢。就喺呢場有接近八折回報嘅場合出擊，今季長捧新特蘭主場波嘅第一注。記住，係第一注，往後幾場新特蘭主場波，都要記得繼續出擊。
冷門之選不妨諗吓另一支主場球隊修咸頓，呢班波今季搵咗唔少攻擊好手返嚟，包括上季喺赫斯打到識飛嘅史卡素、曼城前鋒巴利胡禮菲臘斯，以及波蘭世界盃國腳鋒將拉斯亞克等。周六修咸頓迎戰對手係啱啱有前鋒艾寧頓受傷嘅西布朗，過兩倍分頭最好揀修咸頓Ｗ。
投資特攻隊金句
新特蘭W有約1.8倍回報算好分頭；修咸頓強勢，今仗對手較強令其單Ｗ有好分頭，亦值得追捧。