輪到遼寧省來港招商，大連市外經貿局局長劉德春噚日話，大連市嘅東部港區正進行改造，睇嚟想學香港，做到尖沙嘴或中環嘅效果，香港已有二十家發展商有意參與10月舉行嘅招標活動。嗰度涉及7至8個標段共4平方公里土地，總投資額達50億美元，和黃、九龍倉、新世界發展同新鴻基地產都簽咗意向書，年底會公布結果。
遼寧省副省長李萬才就重點推介「五點一線」沿海經濟帶建設規劃，包括大連長興島、營口、錦州灣、丹東同大連莊河五個地方，將由沿海一級公路連接，涉及土地面積370平方公里，已攞到開發銀行未來5年300億人仔貸款額。
呢頭中央宏調嚴厲壓抑固定資產投資過度增長，那邊遼寧省大興土木？李省長解釋，全國經濟區發展不平衡，中央對宏調嘅實施有保有壓，遼寧省肯定喺保護範圍內，而且遼寧嘅經濟才剛剛有溫度！