家陣環保大旗高舉，製造污染嘅電廠最受影響，在社會壓力下，紛紛要安裝脫硫裝置，減低排污量。不過呢個脫硫裝置嘅投資費用，代價有平有貴，差距可以有天壤之別。
大唐發電董事長翟若愚噚日喺香港舉行業績記者會，介紹佢哋今年開始為旗下電廠陸續安裝脫硫裝置，單是今年會投資2億元人民幣，改善600至700萬千瓦機組的排污量，每部60萬大型發電機組，平均投資成本為1200萬元人民幣。
呢個成本其實好抵，不過咁講大家唔知佢點平法，如果同早前有報道指中電嘅每台機組安裝脫硫裝置費用高達2億美元相比較，中電開支高出逾百倍，咁大家就知大唐嘅成本係超筍價！
咁究竟係中電老襯定大唐老點呢？翟董就話安裝後可以減低二氧化碳排放量達95%，效果一啲都唔差。而按國家政策，呢筆投資費用可以提升電價來彌補，每度電因此可調升1.5分人民幣，呢一樣，中電冇咁着數。