昨日講到國企周不時有高層出事，實在司空見慣，查實大陸公司盈利暴升暴跌一樣係閒事，好似賣蘋果汁的安德利（8259），剛公布今年6月中期業績，盈利比去年同期勁跌94.49％，只有338.5萬元人民幣，實在係嚇人一跳。
難怪昨日安德利股價一度低見0.445元，收0.475元，大跌10.38％。但經紀黃叫小初淡定，佢話安德利曾講過因為蘋果減產影響公司盈利，所以今次倒退係意料中事。
此外，安德利股份主要由芬佬持有，個別芬佬喺早排增持，反映看好前景。昨日股價雖然急跌，但成交金額只有704萬元，點睇都唔似係芬佬洗倉，加上公司管理層表示最壞時刻已過，所以情況唔係咁差。
至於另一隻農業股超大現代（682）就冇咁好彩，雖然出晒新聞稿澄清負面報道，但昨日再跌6.76％，收3.86元，尚未能夠止跌。
慕容小初