今個暑假「單單」地，數碼單鏡反光相機（DSLR）界可謂百花齊放，SONY、Panasonic、Pentax等大廠都推出自家首部DSLR，令唔少相機發燒友為之心動。其實男士玩相機同玩車、玩電話係一樣，心態不外乎兩種︰舊機唔係唔好，只係「心太野」想出部新機試吓﹔再唔係，覺得自己要昇華到更高層次，出部新機代表升咗Level。唔怪之得，一直用開DC機嘅四眼雄，最近係咁搵人陪佢睇DSLR，仲話Canon有部350D超筍，係時候入貨。
網民心思思做機主
其實好似四眼雄咁，想出部350D嘅又何止佢一人，事關Canon將部連鏡Kit裝由$7,680下調至$5,380，坊間即時出現缺貨現象。網上論壇大把新手問老手抵唔抵買、好唔好用，仲互相報料邊度最平，邊度先有埋腳架同1GB卡送埋。講真，買部好啲嘅DC都要3千幾，家陣部機嘅套裝KitSet，包一支18-55mm鏡頭都只賣4千尾至5千頭，「平」易近人吸引到暈，係部好啱新手用嘅入門機。如果想再Pro啲，350D都有大把靚鏡支援，但Canon鏡頭出名貴，所以往後日子就睇用家自己造化喇！
記者：陸俊雄