從未在旺角見過如此令人驚喜的上樓Cafe，驚喜在帶點精神分裂的半中半西裝修，梳化搭木椅，水晶吊燈搭古雅大燈，全部是錯配，卻好玩別致；也驚喜在不用硬啃蛋未熟麵未腍的餐蛋麵，羊架、雞胸、銀鱈魚全部100分美味，打破上樓Cafe無好嘢食的定律；再三驚喜在結賬不付真金白銀，玩會員制用儲值卡，如此多Fun，抵撐。
記者：廖秀娟
攝影：楊錦文
模特兒：Katie
化妝/髮型：Meegan&Kinki
中式旗袍：上海灘
歡迎打躉
「DreamCafe」表面上跟一般上樓Cafe無異，幾個後生仔夾份開舖，玩裝修，有齊大富翁、UNO、無線上網，格局擺明歡迎人打躉。不同的是，Cafe有個好大廚阿熙，他今年28歲，入行8年，在機場候機室的「Pier」做了兩年二廚，在「RelaxingTeaHouse」做了兩年大廚，人怕醜，但說起自己做的菜，卻自信十足：「旺角大部份上樓Cafe都唔會做主菜，多數賣公仔麵、雞翼、三文治呢類小食，我個Menu唔止有海鮮、豬牛扒，連羊架都賣埋，我做嘅羊架，客人一定鍾意食。我覺得自己煮嘢食有人讚，我會好開心。」這晚我試吃了一客炭燒新西蘭羊架，肉汁豐富不羶，單這道羊架，已教我幾乎忘記自己處身上樓Cafe。
行會員制
Cafe身處品流複雜的旺角區，附近有很多一樓一，老闆有做過旺角區上樓舖的經驗，想到用會員制防止馬伕、小姐入舖打躉，阿熙說：「我啲客人全部要入會，會員要買儲值卡埋單消費，正經人家會覺得呢個制度最好。」採訪當晚見現場主要是OL、學生、年輕Sales，煙民也不多，大家各有各玩，飲飲食食、吹水消遣毋須擔心。
48Points：挪威煙三文魚天使麵
挪威煙三文魚肉質鮮甜，拼砌成一朵玫瑰花模樣上碟，賣相浮誇但好看。天使麵個個女生都大讚，我想味道應不錯。
78Points：芝士茄醬焗智利雞胸
雞胸煎至半熟，加自製鮮茄醬稍焗，最後加芝士焗至金黃色，雞胸肉出奇地嫩滑多汁，已很少吃到這麼好吃的雞胸扒了。
98Points：南非銀鱈魚配蟹子忌廉汁
中價南非銀鱈魚雖不及美加貨靚，吃落有點渣，但勝在肉汁嫩滑鮮甜。阿熙用純鮮忌廉自製忌廉汁，不加水加奶特別香滑。
98Points：炭燒新西蘭羊架配紫蘇蜜糖汁
羊架用香草、黑胡椒、橄欖油醃兩日去羶，炭燒後配自製蜜糖紫蘇汁，肉質鬆軟又夠羊肉味，果然是阿熙的撚手菜。
78Points：法式扒大蝦卡邦尼扁意粉
傳統法式卡邦尼做法，用煙肉、洋葱、蒜茸炒好忌廉汁燴意粉，最後加鮮雞蛋和用白酒煎好的加拿大虎蝦，賣相極之吸引。
食客有Say
Kinki：「嚟過4次，雞翼同Cake都好好味，今晚第一次食意粉，原來都好得。畀錢要用儲值卡，幾得意。」
Maggie：「喺呢度傾偈好舒服，有得玩啲嘢又幾好食，價錢幾合理。」
Queenie（右）及Irene：「環境唔錯，天使麵、朱古力香蕉批好好味，不過收Points唔收錢幾麻煩。」
搵食攻略
DreamCafe（23847100）
地址：旺角通菜街61號德發大廈2樓7,8,11,12室
營業時間：星期一至四及日4:00pm-2:00am，星期五及六4:00pm-4:00am
交通：地鐵旺角站銀行中心出口，行3分鐘，入口在女人街內。
座位：75個 最賣得：無骨雞翼、天使麵、羊架、晚餐