孫柏文相信喺我哋特區裏面，冇乜嘢比起會考更能勾起市民嘅感覺，產生共鳴。而我作為一個「飲香港水、流香港血」嘅人，聽到「會考」呢兩個字，當然同大家一樣會百感交集。不過，上個禮拜先至有一個前輩提點過我《金手指》一欄係財經版專欄，所以就算今日想為大家上一課通識教育堂，我都只會從財經口水佬角度去分析「會考」呢個現象。
首先，我唔知道大家有冇感覺得到，近年來好似愈來愈多狀元。以前我細細個睇報紙，睇到關於會考放榜嘅新聞，都會同嗰年嘅狀元好似發生了關係，因為睇完非常仔細、詳盡嘅報道之後，知道狀元嘅嘢分分鐘比起知道自己女朋友嘅嘢更加多同清楚。呢個情況係因為每年每份報紙都會起碼用一版篇幅報道有關，雖然今時今日都一樣，不過以前狀元數目少，就算將所有狀元嘅相印出來，每幅相都有成「車頭相」咁大。
𠵱家，「會考狀元」已經氾濫，如果要將所有狀元嘅相印出來，就算用全版篇幅，結果每個狀元嘅相只會得郵票咁大張。如果冇細心留意，只係用眼尾望吓個版，分分鐘誤會嗰版唔係新聞，而係啲保險公司銷售隊伍，買廣告位去鼓勵自己銷售隊伍裏面嘅topsales。所以，今時今日做狀元其實已經係好cheap。
當然，我今日話班狀元好cheap，某程度上係因為自己當年考唔到，想搵人出氣。不過，今日話佢哋cheap，唔係想扼殺班狀元多年來嘅努力，而係想矛頭直指考試局。大家都知道，除咗每日要搭長途巴士嘅阿叔之外，相信受到最大最大壓力嘅一群特區人，就一定係啲學生哥。今日，我就比喻佢哋為南美洲小國嘅國民。
每個A都有一個犧牲者
呢班南美國民，日做夜做都係為咗每日放工嘅時候，荷包裏面多幾張銀紙。咁每年都有一定數目嘅國民，會因為承受唔到啲壓力，自尋短見。政府眼見佢哋咁辛苦，就開始研究點樣可以減低佢哋嘅壓力。
研究結果就係呢班南美國民所追隨嘅嘢，只不過係政府很容易生產、印刷出來嘅銀紙。不如叫中央銀行瘋狂印刷銀紙，繼而分配畀每日返工放工嘅國民，咪可以皆大歡喜囉！當然，呢個政策大為成功，淨係睇吓噚日嗰啲郵票咁大張嘅「烚熟狗頭」狀元相就知。不過正當政府熱烈慶祝嘅時候，有一群人就靜靜被犧牲咗都唔知道。呢班被犧牲嘅，就係已經退休，不再需要每日返工放工嘅國民。佢哋以前辛辛苦苦儲下來嘅銀紙，就全部唔值錢，亦即係叫做「通脹」。呢班「退休國民」，就係所有以前辛辛苦苦考過會考嘅香港人，你係唔係其中一個？咁大家明白通脹可怕之處啦？
最後，孫柏文想用隻金手指去篤下嗰班考8A、9A、10A嘅朋友。上中六唔係只需要30分就已經滿分咩？你哋冇理由唔知道會考計分係「拉curve」㗎？你哋都知道如果已經有六個A，每次你哋攞多一個A，就會有另一個更需要呢個A嘅人攞唔到。你哋點解要咁自私？雖然我都唔想用呢個詞彙，不過因為今期實在有太多壹傳媒旗下刊物裏面嘅專欄用呢個詞彙，所以我都不妨一用，究竟你班攞多過六個A嘅狀元，係唔係喺度「自瀆」？我希望各位認同以上問題嘅網友，各位希望得到問題答案嘅同學，可以將以上嘅問題轉載出去，直至嗰班狀元答到為止。
孫柏文