如果數真正身體力行請殘疾人士做嘢，八方首推上海灘創辦人鄧永鏘，佢老哥真係請咗Stephen成10年做辦公室助理，Stephen患嘅係唐氏綜合症，佢做得好開心。
呢個星期一，身兼唐氏綜合症協會贊助人嘅特首夫人鮑笑薇去到協會喺灣仔嘅中心訪問，佢原來星期日都睇咗史太祖醫生太太同個女丹丹（患有唐氏綜合症）嘅故事，話好感動。
於是有人就馬上打蛇隨棍上，話不如叫曾太返去同曾生反映，叫特首辦同三司十一局帶頭請殘疾人士工作，做個好榜樣，咁上有好者，下面班人就識做。你開位請副局長同政務助理都得，點解唔可以請多個辦公室助理，幫吓班需要社會多多關懷嘅一群。