將會喺XBOX360推出嘅《DEADRISING》美版會比日版血腥好多，筆者更打聽到，隻Game唔只斷手斷腳爆頭咁簡單，部份類似西片《活死人空間》嘅變態鏡頭，都會喺遊戲入面出現，難怪遊戲被列入「18禁」。至於係咩畫面，由於太血腥關係不便公開，好奇想知嘅話，立即買隻美版《DEADRISING》玩吓就知。
記者︰陸俊雄
攝影︰羅揚聲
想升Level 靠影喪屍
《DEADRISING》設計以記者做主角，一定有佢意思。主角法蘭拎住部相機，唔係貪得意影喪屍，而係除咗救人之外，想升Level，就要靠影相。每次升Level後，可攜物件就多咗，亦因為玩家任何補給物資同武器，都放喺同一地方，所以可攜物件數目有必要盡快增加。如果唔係，玩家想帶4至5樽牛奶作恢復體力用時，就會唔夠位畀你放武器，俾喪屍圍就絕對被動，甚至可以話係死路一條。
至於影相係分兩種，一係影大堆頭大製作，即是一幅相入面愈多喪屍愈好；另一款係埋身肉搏，即是喪屍行到近一近要咬你前一刻，快速影下。好明顯後者難度極高，分分鐘影完就俾人咬，不過想攞高分升Level，係要冒風險喇！
美版血腥兼備笑料
唔知遊戲創作人稻船敬二係咪想緩和隻Game血腥同緊張氣氛，主角法蘭可以不停轉換造型，只要走入唔同店舖，有更衣室就可以換衫。例如穿心心底褲、滑浪Look，再唔係幪面人頭套都有，個頭套仲可以笠住喪屍個頭㖭。另外，地下有喪屍斷手嘅話，都可以執起塞番入喪屍個口度，玩味十足。其實《DEADRISING》除咗血腥三級係賣點外，唔好忽視佢嘅人物造型設計、道具、動作、過場動畫等，各方面細膩嘅表現，都Show到佢係XBOX360王牌遊戲嘅地位。
玩家評語
Wicky話︰10級血腥
「未玩之前，諗住可以一味靠閃，避開晒啲喪屍，一支箭跑去CheckPoint就可以過版。」點知原來臨近目的地，會有幾十隻喪屍包圍你，逼住出手殺到血流成河。「好似起初喺公園走入ShoppingMall嗰幕，要拎定把大鉸剪，跑去商場門口，起勢怒剪喪屍，剪到斷手斷腳屍頭落地，10級血腥。」
喪屍雖然行得慢，但次次都幾十隻咁圍你，正所謂以寡敵眾，筆者雖然鉸剪功厲害，但最終逃唔過俾佢地咬死嘅厄運。其實喪屍咬人或打到周地血嘅場面，邊行邊打時經常出現，屬普通碎料。打後仲有德州電鋸等武器出現，玩家真係要有心理準備至好玩。
記者豪話︰影喪屍壓迫感強
「如果玩《DEADRISING》時，諗住齋行住打就算，你唔會完全感受到個壓迫感。隻Game設計得好醒，加入埋影相升Level功能，仲要影啲喪屍咬到埋身先最高分，嗰吓緊張就完全出晒嚟。」
除咗影相，執到嘅武器都好似迫人埋身打先有效咁。好似用槍，今勻真係唔用好過用，威力唔夠，搞到好易被人圍﹔至於用棍同花盆仲好，埋身打，喪屍被打低或彈開嘅機會較大，畀時間你急急腳走。
Candy話︰再玩會嘔
「聽聞美版比日版血腥好多，咪諗住落場試吓佢有幾恐怖。點知玩兩下，就俾喪屍咬到噴晒血咁﹔打爆咗喪屍個頭，又係噴到周圍血，呢勻真係唔知打好定唔打好。」
Candy想轉戰改為遠距離影喪屍，因為只要影到一大堆，同樣分數唔少。而且未正式開波前，主角坐喺直升機上，玩家可以試吓遠距離影相，作落場前熱身準備。可惜Candy落到地面影，即俾人咬住唔放，繼續噴血。Candy只好認輸，仲話太血腥撐唔住，再玩落去嘔都有之。
《DEADRISING》
遊戲類型︰AVG
對應機種︰XBOX360
遊玩人數︰1人
開發廠商︰CAPCOM
發售日期︰8月10日
美版行貨售價︰$388
