恒生柯大俠都算勇，噚日率先宣布利率不變，點知中銀仲勇，減最優惠利率，同滙豐恒生睇番齊，保持競爭力。大行咁鬥法，其他小銀行唔知點算，莫講減息搶客，單係開禮拜六已經考起。至於小存戶，𠵱家恒生大額定期存款得3厘，真係放紅簿仔好過。所以加息周期喺香港嚟講，實在早過美國結束，暫時嘅影響，係將啲錢趕入股市。
講開中銀，佢哋下個星期又有新搞作，唔係搶客，而係搶血！話說中銀旗下個慈善基金，下個禮拜會再次孖住紅十字會，搞捐血周，事關每年夏天都係血庫嘅「貧血期」，所以要搞吓花臣，畀啲甜頭，吸引多啲人嚟捐血。咁甜頭係乜？就係請大家食餐健康午餐。有翠亨村同埋雲陽閣二揀一，唔鍾意可以揀部運動測量器。