賓架Ｗ請睇ThePhantomoftheOpera，請埋食飯，送飲品券，送埋場刊及DVD，全套請齊，真係多謝之至。賓架Ｗ嘅千金在大學攻讀音樂，喜歡聲樂，唱女高音。賓架Ｗ錫女錫到濃、大力鼓勵，Ｗ千金遲啲就參加《費加羅的婚禮》嘅演出，呢套本地製作歌劇，由莫華倫擔綱，Ｗ千金旨在爭取演出經驗而已。
賓架Ｗ更為《費加羅的婚禮》籌募贊助費，籌得幾辛苦。你知啦，香港嘅歐西風味文化藝術，平時唔會有好多人理會本地歌劇話劇上演，想話賺回成本，並不容易。喺西九龍文娛藝術區諮詢期間，因三大財團爭鋒，曾經掀起一片商業贊助藝術之風，演藝界高興到不得了，但一啲只識彈，唔曉唱，更唔係靠演藝事業食飯之所謂文化評論員，對西九大潑冷水，話支持西九之人（如高志森、莫華倫等人）有利益衝突之嫌，卒之推翻西九計劃，以後如何重新上馬，遙遙無期。好嘞，西九無人提之後，藝術團體搵贊助，難如登天！文化「評論員」彈死西九之後，拍拍籮柚就鬆人，以後可能繼續「彈東九」！但演藝界對表演事業有長期承擔，繼續要捱一段苦日子。
好多老友啲仔女入英美大學讀經濟、財務、數學、工程，讀完就殊途同歸，入投資銀行做衍生工具derivates，搵錢快夾妥，年青人希望三十歲前就買一間半山區千零呎，加一架波子，唔怕目前做到氣咳。賓架Ｗ千金讀音樂，慈善Ｙ千金讀人類學與戲劇，律師Ｈ千金讀德國文學，可算異類。下一代讀邊科，家長無謂干預，子女鍾意主修一啲搵銀科，恭喜佢！子女要讀文科、藝術，何須阻止。社長Ｍ之千金係劍橋高材生，一畢業就入咗倫敦一間跨國銀行，眨吓眼過咗三年，Ｍ千金話自己搵錢太多，一時使唔晒，辭工去也，聽講轉到後進地區國家做義工，擴闊心靈先，Ｍ社長自然任由千金作主。年青人自有一套，家長干預唔嚟。