禮拜三我哋特區凌晨，聯儲局開例會決定咗「暫時停止加息」。呢個決定當然令孫柏文非常失望，因為大家都應該知道我曾經多次大叫：「伯南克叔叔，為咗維護美元和所有同美元掛鈎貨幣嘅購買力，為咗擊退已經惡化嘅花旗國通脹，請你繼續加息吧！」雖然叫咗咁多次，伯南克都係好殘忍咁，「暫時停止加息」。呢個唔知係唔係因為我叫「伯南克叔叔，唔好停啊！」佢心裏邊就會諗：「WhatisthisChinamanshoutingabout？Doesn'theknowIdon'tspeakChinese？」不過佢唔聽我講都冇辦法。
孫柏文由細細個開始，就聽過一個故事，相信大家都聽過，不過都要為大家重溫故事教訓。故事教訓就係如果要真正幫助別人，送條魚畀佢食，不如就教佢釣魚，等佢可以自己搵食。有見及此，今日我決定用隻金手指為大家篤一課「如何解讀聯儲局聲明」雞精速成班。
首先，每一次聯儲局開會商議會唔會加或者減息，佢哋嘅決定都會喺「聯儲局聲明」裏面宣布。佢哋唔會開記者招待會，唔會網上現場直播，佢哋只會發一個聲明，就係咁簡單。大家可能會話：「一個可以炮製或摧毀成億上兆嘅紙上財富，一個咁似神發嘅重要聲明，一定係聖經咁長，教授論文咁難明，淨係啲註腳都幾廿頁。」
我今日講嘅，絕對唔長又唔難明。聯儲局聲明其實次次都係分開五段，段段都好短。例如，啱啱禮拜三凌晨嘅聯儲局聲明，總字數只不過係216個字。一篇二百幾個字嘅文章，就連我七歲大嘅姪仔Louis都寫得出來。仲有，聲明裏面嘅五段文字，第一和最尾嗰段可以唔理。
因為第一段只係講聯儲局嘅決定，用禮拜三嘅聲明做例子，第一段就話：「我哋今日決定利率維持不變。」第五段，即係最尾嗰段，只係講聯儲局裏面有份投票嘅人，點樣投票。再用禮拜三嘅聲明做例子，最尾嗰段話：「投票支持聯儲局決定將利率維持不變有邊個邊個、又有邊個邊個……最後投票反對聯儲局決定嘅有邊個邊個，而佢就支持加息四分一厘。」
中間三段，只有137個字，真係背熟佢都可以。不過，今次聯儲局聲明，最重要一點就只不過係8個字。呢8個字就係「inflationpressuresseemlikelytomoderateovertime」，重要嘅原因就係今次伯南克上台之後，第一次聲明裏面有前瞻性嘅預測。大家可能會問：「伯南克成日都話會睇數據做人，唔會做預測，點解今次又做呢？」答案其實非常簡單，轉風格嘅原因，係因為如果佢唔用預測出來嘅未來嚟肯定自己嘅決定係啱嘅，而係用手頭上，過去的數據，根本唔可以停止加息。經過禮拜三嘅會議，聯儲局已經押重注買冇通脹，佢哋寧願冒着有通脹嘅危險，都唔肯加息。喺花旗國，唔怕通脹嘅人就叫做鴿派doves，而怕通脹嘅人就叫做鷹派hawks，聯儲局一路都係用隻鷹做logo，今次我就為大家篤爆佢哋，幫佢哋個logo換隻白鴿。
孫柏文